«Atameken» UKP tóraǵasynyń orynbasary Tımýr Járkenov atap ótkendeı, qazirgi ýaqytta is júzinde salalyq memlekettik organdardyń zańǵa táýeldi aktilerinde quqyqtyq belgisizdik týyndady. Atap aıtqanda, máseleler TMKKK, MÁMS tizbelerine kiretin dárilik zattardyń, sondaı-aq orfandyq jáne áleýmettik mańyzy bar aýrýlardyń ımporty men dárihana jelilerindegi bólshek saýdasyna qatysty. QQS-ty eskerse nemese ony eseptemegendegi dári-dármektiń shekti baǵasyn qalyptastyrý máselesi de kóterildi.
Tımýr Járkenovtiń aıtýynsha, ımporttyq dárilik zattardy kedendik rásimdeý kezinde keden organdary atalǵan tizbelerge kiretin barlyq dárilik zattyń nysanaly maqsatyn rastaýdy talap etedi. Bul rette mundaı talap qoldanystaǵy erejelerdi keńinen túsindirý ári bul ákelinetin dárilerdiń barlyq sanatyna arnalmaǵan.
Memlekettik kirister komıteti tóraǵasynyń orynbasary Jánibek Nurjanov barlyq dárilik zatty ımporttaý kezindegi mindetti shart farmasevtıkalyq nemese medısınalyq qyzmetke lısenzııanyń bolýy, memlekettik tapsyrys boıynsha beriletin dáriler úshin TMKKK/MÁMS sheńberindegi jetkizý sharty, sondaı-aq taýardy maqsatty paıdalaný týraly jetkizýshiniń mindettemesi ekenin túsindirdi.
Tirkelgen dárilik zatty ımporttaý kezinde Qazaqstan Respýblıkasynyń aýmaǵynda memlekettik tirkeý talap etiledi. Tirkelmegenderge Densaýlyq saqtaý mınıstrliginiń ruqsat qujaty qajet. Bul rette nysanaly maqsatty rastaý Qazaqstan aýmaǵynda óndiris úshin paıdalanylatyn dárilik sýbstansııalar men balk-ónimderdi ımporttaý kezinde ǵana qajet.
Talqylaý qorytyndysynda másele Jobalyq keńseniń otyrysynda sheshildi. Qoldanystaǵy erejelerge ózgeris engizilip, dárilik zattardyń ımporty jónindegi ustanym jumysta qoldaný úshin taıaýda keden organdarynyń aýmaqtyq bólimshelerine jetkizilmek.
Jańa 4 farmasevtıkalyq zaýyt salynady: Elimizde qandaı dári-dármekter óndiriledi?
Taǵy bir másele orfandyq jáne áleýmettik mańyzy bar aýrýdy emdeýge arnalǵan dárilik zatty QQS-tan bosatýǵa qatysty. Qazirgi ýaqytta dárihanalar mundaı dári-dármekti jetkizýshilerden satyp alýdan bas tartyp otyr. Sebebi jetkizýshiler qoldanystaǵy ereje tek ımport kezinde ǵana emes, kóterme jáne bólshek saýda da QQS-tan bosatylatynyna qaramastan 5% jáne 16% stavkalaryn qoldanady. Bul norma áleýmettik mańyzy bar dári-dármekti bólshek saýdasyna qol jetkizýge arnalǵan.
Talqylaý qorytyndysy boıynsha, Densaýlyq saqtaý mınıstrliginiń Medısınalyq jáne farmasevtıkalyq baqylaý komıteti MKK-men birlesip, qysqa merzimde biryńǵaı ustanymdy ázirlep, ony farmasevtıkalyq qoǵamdastyqtyń nazaryna jetkizýi tıis.
QQS eseptelgen nemese ol qosylmaǵan dárilik zattar men medısınalyq buıymdarǵa shekti baǵalardy bekitý máselesi de talqylandy. Bul rette salyq tóleýshi QQS-ty shekti baǵadan tys esepteýge quqyly. О́ıtkeni ol naqty ótkizý baǵasy emes, jol beriletin joǵarǵy shek qana.
Densaýlyq saqtaý mınıstrligi men MKK qysqa merzimde osy másele boıynsha biryńǵaı sheshim ázirlep, ony bıznes-qoǵamdastyqqa jetkizedi.
MKK tarapynan densaýlyq saqtaý salasyna baılanysty QQS boıynsha normalardy qoldanýǵa baılanysty birqatar másele aıtyldy. Olardyń barlyǵy Jobalyq keńseniń otyrysynda qaraldy. Jaqyn arada bıznesti aqparattandyrý úshin MKK resýrstarynda jarııalanady.
О́tken aptada salyq organdaryna, Ulttyq ekonomıka mınıstrligine jáne «Atameken» UKP-ǵa 16,1 myń ótinish kelip tústi. Bul ótken aptamen salystyrǵanda 3,4 myńǵa az. 16 myńǵa jýyq ótinish MKK kommýnıkasııalar arnalary arqyly kelip túsýde. Olar salyqtyq ákimshilendirý máselesine qatysty.
