Sýretterdi túsirgen: Erlan Omar
Jıyndy Qoǵamdyq damý mınıstri D.Káletaev ashty.
«Azamattyq forým osymen elimizde segizinshi ret uıymdastyrylyp otyr. Atalmysh forým elimizde ár eki jyl saıyn ótedi. Bıylǵy forýmnyń ereksheligi forým jumysyna alǵash ret Memleket basshysy qatysqaly otyr. Bul forým búgingi tańda úlken mańyzǵa ıe. Shara barysynda qoǵam ómiri jaıynda ózekti suraqtardy talqylaıtyn bolamyz. Azamattyq damý suraqtary bizdiń qoǵam úshin óte mańyzdy. Normatıvtik quqyqtar men saıası sheshimder qabyldamas buryn biz birinshi kezekte qoǵam pikirine qulaq asamyz. Respýblıkalyq forýmdy ótkizýge daıyndyq barysynda birqatar jumystar atqaryldy. Buǵan deıin elimizdiń ár oblysynda aımaqtyq azamattyq forýmdar ótti. Búgingi respýblıkalyq forýmǵa tańdaýly aımaqtyq delegattar jınalyp otyr. Is-shara barysynda qoǵam úshin mańyzdy oılarmen bólisip, ashyq dıalog alańyn quramyz. Sonyń negizinde árbirimiz úshin mańyzdy sheshim qabyldaımyz degen nıettemin», dedi D.Káletaev.
Is-shara sheńberinde semınarlar, dóńgelek ústelder, pikirtalas alańdary, mınıstrlikter men vedomstvolar basshylarymen salalyq kezdesýler formatyndaǵy 35 taqyryptyq sessııa jumystary ótedi dep josparlanýda.
Taqyryptyq sessııalar memlekettik organdardy jańǵyrtý, medıa jáne ashyqtyq, ekologııa jáne qorshaǵan ortany qorǵaý, áleýmettik kásipkerlik jáne ınnovasııa, IT jáne Big Data, tutynýshylardyń quqyqtaryn qorǵaý, belsendi azamattyq qoǵamdy qalyptastyrýdaǵy JOO men mektepterdiń róli syndy ózekti máselelerdi talqylaýǵa arnalady.
Búgingi jıynǵa halyqaralyq uıymdardyń, memlekettik jáne bıznes qurylymdardyń sondaı-aq qoǵamdyq keńesterdiń ókilderi qatysyp jatyr.
Marjan TILEÝBEK,
«Egemen Qazaqstan»
