Tuńǵysh Prezıdent kúnine arnalǵan basqosýǵa «Nur Otan» partııasy Tóraǵasynyń birinshi orynbasary Máýlen Áshimbaev, Halyqaralyq Túrki akademııasynyń prezıdenti Darhan Qydyráli, «Ulttyq kardıohırýrgııalyq ǵylymı ortalyǵy» AQ basqarma tóraǵasy Iýrıı Pıa, «Meıirim» qaıyrymdylyq qorynyń negizin qalaýshy Arýjan Saın jáne stýdent-jastar qatysty.
Alǵash bolyp sóz alǵan «Nur Otan» partııasy Tóraǵasynyń birinshi orynbasary M.Áshimbaev Elbasy sheshimderiniń el damýyndaǵy róli men mańyzyna qatysýshylardyń nazaryn aýdardy. О́z tájirıbesindegi keıbir esteliktermen bólisip, jas qazaqstandyqtardyń erteńgi kúnge degen senimin kúsheıte tústi.
«El damýyndaǵy erekshe oqıǵalardyń biri bolǵan Elbasynyń kelesi strategııalyq bastamasy da «Bolashaq» baǵdarlamasy sııaqty áli kúnge deıin Qazaqstandy jarqyn bolashaqqa bastap keledi. Ol – Qazaqstan Prezıdentiniń osydan 20 jyl buryn elordamyzdy Almatydan sol kezdegi Aqmolaǵa aýystyrý týraly tarıhı sheshimi. Úshinshi strategııalyq bastama – «Rýhanı jańǵyrý» baǵdarlamasynyń júzege asyrylýy. Búginde júıeli túrde júrgizilip kele jatqan bul baǵyttaǵy jumystardyń da el bolashaǵy úshin mańyzy zor», dedi M.Áshimbaev.
Qatysýshylar taqyrypqa saı táýelsiz Qazaqstannyń Tuńǵysh Prezıdenti, Elbasy Nursultan Ábishuly Nazarbaevtyń elimizdi damýdyń jańa deńgeıine alyp shyqqan bastamalary men tarıhı sheshimderi jaıynda keńinen sóz qozǵady. Sondaı-aq olar ózderiniń Memleket basshysymen kezdesýleri, bul oqıǵanyń ómirlerine qalaı áser etkenine toqtaldy. Odan bólek, Elbasynyń mańyzdy bastamalary qalaı ómirge kelgenin, olardyń qabyldanýyna qandaı oqıǵalardyń sebep bolǵanyn jáne sol bastamalardy júzege asyrýda ózderiniń naqty qandaı úles qosqanyn da kópshilikke áńgimelep berdi.
Abaı ASANKELDIULY,
«Egemen Qazaqstan»
