Stansııanyń ashylý saltanatyna Qyzylorda oblysynyń ákimi Qyrymbek Kósherbaev jáne «QazMunaıGaz» UK» AQ dırektorlar keńesiniń tóraǵasy Qaırat Sháripbaev qatysty. Sharany Astanada QR Energetıka mınıstri Qanat Bozymbaev, «QazMunaıGaz» UK» AQ basqarma tóraǵasy Alık Aıdarbaev jáne respýblıkanyń gazben qamtamasyz etetin kásiporyndarynyń basshylary tikeleı baılanys arqyly tamashalady.
Biz Aral óńirinde «Aral» kompressorlyq stansııasynyń iske qosylý rásimine kýá boldyq. Uly dalanyń qýatyn el ıgiligine jumsaý múmkindigin táýelsiz elimizdiń qarqyndy damyp kele jatqanynyń bir dáleli retinde atap ótýge bolady. «KazTransGaz» AQ qyzmetkerleri bólingen 50 mlrd teńge qarjyǵa jeti aıda rekordtyq ýaqyt ishinde óte mańyzdy nysandy iske qosyp otyr. Sonymen qatar, jaqyn arada «Qorqyt ata» kompressorlyq stansııasy iske qosylady. Táýelsizdik merekesiniń qarsańynda «Qaraózek» kompressorlyq stansııasynan bastap Astanaǵa qaraı Saryarqa magıstraldy gaz qubyrynyń qurylysy bastalyp, Elordamyzǵa kógildir otyn jetkizý jobasynyń bastalýyna kýáger bolamyz. Osynyń barlyǵy - halqymyzdyń aýyzbirshilik, yntymaǵynyń jáne Elbasy saıasatynyń arqasynda»,-dedi aımaq basshysy.
Sondaı-aq Energetıka mınıstri Qanat Bozymbaev qyzylordalyqtardy stansııanyń iske qosylýymen quttyqtady.
Esterińizge sala keteıik, Qyzylorda oblysynyń ákimdigi men «QazMunaıGaz» UK» AQ arasyndaǵy memorandýmǵa sáıkes Aral, Qazaly, Shıeli jáne Jańaqorǵan aýdandaryn jáne Baıqońyr qalasyn gazdandyrý jobasy júzege asyryldy. Bıyl QR Energetıka mınıstrliginiń qoldaýymen qalǵan 3 aýdan ortalyǵyn - Josaly, Tereńózek jáne Jalaǵashty gazdandyrý jumystary bastaldy, 2020 jyly barlyq 7 aýdan ortalyǵyn kógildir otynǵa qosý josparlanýda.
Qazirgi tańda óńirde oblys halqynyń 63%-y tabıǵı gazben qamtamasyz etilgen, 2020 jylǵa qaraı gazdandyrýdy 95% - ǵa jetkizý mindeti qoıylǵan.
