О́ńirdegi aýyl sharýashylyǵy damyǵan, astyqty Fedorov aýdany 90 jyldyǵyn atap ótti. Osy mereıli merekege baılanysty saltanatty jıynda aýdan ákimi Táýba Isabaev óńir tarıhyn, aǵa urpaqtyń erligi men eńbegin baıandap berdi. 1928 jyly qurylǵan aýdannyń baı tarıhy bar. Bul óńir ujymdastyrýdyń, ashtyqtyń, saıası qýǵyn-súrginniń, soǵystyń alapat qasireti men qıyndyqtaryn bastan keshti. Alǵashqy keńestik sharýashylyqtar quryldy, qara topyraqty óńirde ótken ǵasyrdyń 50-shi jyldary tyń jáne tyńaıǵan jerler ıgerildi.
Eldiń ál-aýqaty jaqsardy. Aýdan Qazaqstannyń Táýelsizdigin alǵan jyldardan keıin de aýyl sharýashylyǵyn damytýǵa barynsha atsalysyp keledi. Munda qazir jańa tehnologııalardy, ozyq tájirıbelerdi paıdalanyp, egin jáne mal sharýashylyǵyn damytyp otyrǵan sharýashylyqtar jetkilikti. Fedorov aýdanynyń dıqandary 11 mıllıon tonna astyq óndirdi, bıyl da merekeli jyly olar 500 myń tonna astyq jınap, gektar aınalymyn 16,5 sentnerge jetkizdi.
Saltanatty jıynǵa oblys ákimi Arhımed Muhambetov qatysyp, aýdan turǵyndaryn merekemen quttyqtady.
«Elbasynyń «Uly dalanyń jeti qyry» atty maqalasynda: «Ýaqyt pen keńistiktiń kókjıegi toǵysqan kezde ult tarıhy bastalady» degen bolatyn. Fedorov aýdanynyń tarıhy da el, óńir tarıhynyń bir bólshegi. Fedorov –oblystaǵy ekonomıkasy qarqyndy damyp otyrǵan aýdannyń biri. Jyl saıyn aýyl sharýashylyǵy, óndiris, óńdeý ónerkásibi ósip keledi. Memlekettik baǵdarlamalarjúzege asyp jatyr. Aýdan irgetasyn qalaǵan atalar rýhyna bas ıemiz. Osy óńirde týyp ósken Keńes Odaǵynyń batyry Georgıı Kravsov, Ivan Jýrba, 12 Sosııalıstik Eńbek Erleri, akademıkter men memlekettik qyzmet ardagerleri tek fedorovtyqtardyń ǵana emes, elimizdiń, ultymyzdyń maqtanyshtary.Búgin de aýdannyń eńbek torysyndaı muǵalimderin, kásipkerlerin, dıqandar men malshylaryn, sportshylar men óner adamdaryn maqtanysh tutamyz» dedi Arhımed Begejanuly.
Fedorov aýdanynda ekonomıka jyldan jylǵa damyp, adamdardyń ál-aýqaty jaqsaryp keledi. Jaqynda ǵana táýligine 50 tonna tazartylǵan ósimdik maıyn óndiretin, ónimin eksporttaıtyn qýatty maı zaýyty iske qosyldy. Aýdan kólemine gaz qubyry keldi. Osynyń barlyǵy da Fedorov aýdanynyń gúldene beretinine kepil bolady.
Saltanatty jıynda fedorovtyqtar E.О́mirzaqov atyndaǵy oblystyq fılarmonııa ártisteri men aýdan ónerpazdarynyń kúshimen qoıylǵan konsertti tamashalady.
Názıra Járimbet,
«Egemen Qazaqstan»
Qostanaı
