Elbasymyz qoǵam tarapynan zor serpilis týdyrǵan «Uly dalanyń jeti qyry» atty baǵdarlamalyq maqalasynda uly dalanyń uly esimderin ulyqtaýdy jáne ortaq folklorlyq muralardy zertteýdi aıryqsha tapsyrǵan edi. Atalǵan maqala keńinen talqylanyp jatqanda alystan aqjoltaı jańalyq jetti. Altaıdan taraǵan túgel túrkiniń kıesi, qobyzdyń ıesi, ortaq mıf pen folklordyń atasy sanalatyn Qorqyt ata murasy adamzat tarıhynda aıryqsha iz qaldyrǵan qubylys retinde IýNESKO-nyń materıaldyq emes mádenı muralar tizimine endi.
Byltyr naýryz aıynda Qazaqstannyń bastamashylyǵymen jáne baýyrlas Túrkııa, Ázerbaıjan memleketteriniń qoldaýymen uıymnyń qaraýyna alynǵan bul jumys osylaısha ıgi nátıjemen aıaqtaldy. «Qorqyt ata murasy: dastan, ańyz jáne mýzyka» degen ataýmen engizilgen qujat Mavrıkıı Respýblıkasynyń astanasy Port-Lýıste ótken IýNESKO-nyń materıaldyq emes mádenı muralardy qorǵaý jónindegi komıtetiniń 13-úkimetaralyq otyrysynda maquldanyp, tıisti sheshim qabyldandy.
Barsha halqymyzǵa qutty bolsyn!
