Elbasy qazaqstandyqtardyń ál-aýqaty men turmys sapasyn arttyrý Úkimettiń negizgi mindeti sanalatynyn aıtty.
– Memleket jyl saıyn áleýmettik salany qarjylandyrý kólemin arttyryp, mindettemelerdiń bárin oryndap keledi. Bıyl osy maqsattarǵa 2,6 trıllıon teńge bólindi. Bul byltyrmen salystyrǵanda 21,3 paıyzǵa kóp, – dedi Qazaqstan Prezıdenti.
Memleket basshysy turǵyndardyń turmys sapasy men tabysyn arttyrýǵa arnalǵan bıylǵy Joldaýda eń tómengi jalaqy mólsherin kóbeıtý úshin sharalar kesheni qamtylǵanyn erekshe atap ótti.
– 2019 jylǵy 1 qańtardan bastap tómen jalaqy alatyn eńbekkerlerdiń, sonyń ishinde azamattyq qyzmetshilerdiń eńbekaqysy 1,5 ese ósedi. Sondaı-aq, ákimshilik, kómekshi jáne tehnıkalyq qyzmet kórsetetin qyzmetkerlerdiń jalaqysy artady. Ekonomıkanyń barlyq salasyndaǵy tómen jalaqy alatyn 1,3 mıllıon jaldamaly jumysshylardyń jalaqysy ortasha eseppen 30 paıyzǵa kóbeıedi, – dedi Nursultan Nazarbaev.
Elbasy áleýmettik qamsyzdandyrýdyń memlekettik júıesine ózin-ózi jumyspen qamtyǵan turǵyndardy tartý maqsatymen jyl basynan beri 2,7 mıllıon adamnyń 1,8 mıllıonynyń mártebesi jańartylǵanyn aıtty. Memleket basshysy 2019 jyldan bastap Qazaqstannyń jumys isteıtin barlyq azamattary úshin Biryńǵaı jıyntyq tólem engizý josparlanyp otyrǵanyn atap ótti.
– 2018 jylǵy 1 qańtardan bastap turmysy tómen otbasylar úshin ataýly áleýmettik kómektiń jańa formatyn engizdik. Sonyń arqasynda bıylǵy 10 aıdyń ishinde 103 myńǵa jýyq otbasy nemese 534 myń adam memlekettik qoldaý sharalarymen qamtyldy, – dedi Qazaqstan Prezıdenti.
Sonymen qatar, Memleket basshysy tıisti vedomstvo jetekshisine beriletin shaǵyn nesıe sanyn kóbeıtý qajettigin jáne olardyń halyqqa qol jetimdiligin arttyrýdyń mańyzdylyǵy týraly aıtty.
– Osy jyldyń sońyna deıin eń tómengi jalaqy mólsherin bir jarym ese ósiretin zańnyń qabyldanýyn qamtamasyz etý qajet. Mınıstrlik jáne ákimdikter jumys berýshilerdiń eń tómengi jalaqy mólsherin arttyrýyn qamtamasyz etý úshin baqylaý ornatyp, tıisti túsindirý jumystaryn júrgizý jóninde sharalar qabyldaýy kerek. 1,3 mıllıon azamatymyzdyń jalaqysy naqty kóbeıýge tıis, – dedi Nursultan Nazarbaev.
Elbasy 2019 jyldyń 1 qańtarynan bastap jasyna baılanysty beriletin zeınetaqy tólemderin 7 paıyzǵa, sondaı-aq múgedektigi boıynsha jáne asyraýshysynan aıyrylǵan jaǵdaıda beriletin memlekettik áleýmettik járdemaqylar kólemin 5 paıyzǵa arttyrý qajet ekenine toqtaldy.
Basqosý barysynda áleýmettik saqtandyrý máseleleri de talqylandy. Osyǵan oraı, eńbek etý qabiletin joǵaltýyna, jumystan bosap qalýyna nemese asyraýshysynan aırylýyna baılanysty beriletin áleýmettik tólemaqynyń ortasha kólemin 30 paıyzǵa arttyrýdy qamtamasyz etý kerektigi aıtyldy.
Qazaqstan Prezıdenti múgedekter sanatyna jatatyn azamattardyń ózin-ózi tanytýy jáne tolyqqandy ıntegrasııasy úshin jaǵdaı jasaý maqsatymen Múmkindigi shekteýli adamdardyń quqyqtaryn qamtamasyz etý jáne turmys sapasyn jaqsartý jóninde jańa ulttyq jospar ázirleýdi tapsyrdy. Bul qujat múgedektiktiń aldyn alý, keń aýqymdaǵy ınklıýzıvti bilim berýdi engizý, erekshe muqtaj jandarǵa arnalǵan barlyq áleýmettik jáne kólik ınfraqurylymyn beıimdeý jónindegi sharalardy, sondaı-aq, jumys berýshiler men bıznestiń múgedekterdi jumyspen qamtý isine belsendi atsalysýyn qamtamasyz etý jónindegi tetikterdi qamtıdy.
Memleket basshysy sıfrlyq ekonomıkaǵa jáne 4.0 ındýstrııasyna kóshýimizge baılanysty eńbek resýrstarynyń sapasyna qoıylatyn talaptardyń kúsheıgenine nazar aýdardy.
– Sapaly jumys oryndaryn ashý úshin eńbek naryǵyn damytýdyń jańa tásilderin ázirleý kerek. 2025 jylǵa qaraı qosymsha 2 mıllıonǵa jýyq jas maman eńbek naryǵyna shyǵady dep boljanyp otyr. Jastarymyzdy tıisti jumys oryndarymen qamtamasyz etý mańyzdy, – dedi Qazaqstan Prezıdenti.
Jıyn sońynda Nursultan Nazarbaev Prezıdent Ákimshiligine berilgen tapsyrmalardyń oryndalýyn baqylaýǵa alýdy tapsyrdy.
