Aq Jaıyq óńirinde ozyq tehnologııany engizý boıynsha jetistikter az emes. Máselen, Oral qalasyndaǵy joǵary agrarlyq-tehnologııalyq kolledjinde bilim salasyna BIM tehnologııany engizý qolǵa alynǵan. Astanadaǵy EKSPO kórmesinen bastalǵan bul joba Oralda jalǵasyn taýyp, elimizde tuńǵysh ret kolledjde «BIM SPACE» vırtýaldy kórinis kabıneti» ashyldy. Osy arqyly shákirtter ozyq ınnovasııany oqý úderisinde kórip, paıdalanyp, jetildire alady. «Kolledj bitirýshileri básekege qabiletti, joǵary deńgeıli maman bolyp shyǵady», deıdi oqý ornynyń basshylary. VIM tehnologııasy – jobalaý-salý-paıdalanýdyń zamanaýı tásili. Oblys ákimi Altaı Kólginov bıyl kóktemde Helsınkı qalasyna barǵanda Fınlıandııa Bısnes-Hab jáne «Collaprime Oy» kompanııasymen arada úshjaqty kelisimshart jasasqan edi. Sonyń nátıjesinde óńirde fındik IT tehnologııa batyl engizile bastady. Kolledj dırektory Serik Muhambetálıevtiń aıtýynsha, stýdentterdi 3D jobasymen oqytatyn qurylǵylardy satyp alýǵa jáne kolledj oqytýshylaryn oqytýǵa 133 mıllıon teńge qarjy jumsalǵan.
Premer-Mınıstrdiń orynbasary budan keıin aýdandardan iriktelip alynǵan 102 oqýshy bilim alyp jatqan IT lıseıdiń de jumysymen tanysty. Zamanaýı jataqhanamen qamtylǵan, robot tehnıka, 3D modeldeý, baǵdarlama jasaý, IT-park kabınetteri bar lıseı túlekteri ıntellektýaly joǵary, ashyq ta ozyq oıly mamandar bolyp shyǵady.
Búgingi tańda óńirde «Smart City» tujyrymdamasyna sáıkes «Qoljetimdi ákimdik», «Smart Uralsk» ortalyǵy, «Mamandandyrylǵan HQKO», «Kóshi-qon HQKO» ashylyp, qalypty jumys isteýde. Sondaı-aq jer qatynastary salasynda jer resýrstarynyń biryńǵaı portaly ashylyp, «Jer ýchaskesin tańdaý aktisin bekitý» qyzmeti avtomattandyryldy. Buryn azamattar tańdaý aktisin alý úshin 3 aı kútý kerek bolsa, qazir bul qyzmet 5-12 kún aralyǵynda kórsetiletin boldy. Keler jyly 60, al 2020 jyly 33 eldi meken sapaly ınternet qyzmetimen qamtylatyn bolady, – deıdi óńir basshysy Altaı Kólginov.
Oral qalasyndaǵy medısınalyq mekemelerdiń de qaǵazsyz qarym-qatynasqa kóshe bastaǵanyna biraz ýaqyt ótti. Nátıjeleri óte jaqsy. Premer-Mınıstrdiń orynbasary munyń mysalyn №3 emhana jumysymen tanysa júrip kórdi. Máselen, qazirdiń ózinde emhana kórsetetin 121 eseptik qyzmettiń 108-i qaǵazsyz atqarylady.
Premer-Mınıstrdiń orynbasary óńirde qoldanysqa engizilgeli jatqan eki qanatqaqty jobamen tanysty. Onyń biri «112» – biryńǵaı kezekshilik-dıspetcherlik qyzmeti. Bul qyzmet oblystyq IID Jedel basqarý ortalyǵy bazasynda qurylǵan. Al ekinshi «109» qyzmeti – «Smart Uralsk» jobasyna kiretin, Oral qalalyq kommýnaldyq jáne apattyq qyzmetterdiń Call-ortalyǵy.
Sapardyń ekinshi kúni «Qarashyǵanaq Petrolıým Opereıtıng» kompanııasynyń Oral qalasyndaǵy keńsesinde «Batys Qazaqstan oblysynyń sıfrly túrlenýi» atty halyqaralyq forýmmen jalǵasty. Jıynda ásirese munaı-gaz salasyna ozyq tehnologııany engizý máselesi talqylandy.
Qazbek QUTTYMURATULY,
«Egemen Qazaqstan»
