Otyrysty asha otyryp, OSK tóraǵasy Berik Imashev saılaý komıssııalarynyń jańa quramdary 2019 jyldyń birinshi toqsanynda qazirgi quramdardyń ókilettik merziminiń aıaqtalýyna baılanysty qalyptasýda ekenin atap kórsetti. Komıssııalardyń jańa quramdaryn saılaý boıynsha máslıhattardyń sessııalaryn 2019 jyldyń 15 qańtaryna deıin ótkizý josparlanyp otyr.
«Qazaqstan Respýblıkasyndaǵy saılaý týraly» Konstıtýsııalyq zańnyń kúshine engen túzetýlerine sáıkes komıssııalardyń quramdaryn qalyptastyrý tártibi rettelip, qoldanystaǵy quqyqtyq kemshilikter joıyldy. Alǵash ret aýmaqtyq saılaý komıssııalarynyń jańa quramdarynda tóraǵalar nemese olardyń orynbasarlary, sondaı-aq hatshylar ózderiniń ókilettikterin turaqty kásibı negizde júzege asyrady.
«Qazaqstan Respýblıkasyndaǵy saılaý týraly» Konstıtýsııalyq zańnyń 10-babyna sáıkes aýmaqtyq jáne ýchaskelik saılaý komıssııalarynyń múshelerin saıası partııalardyń usynystary negizinde tıisti máslıhattar saılaıdy.
Árbir saıası partııa tıisti saılaý komıssııasynyń quramyna bir kandıdatýra usynýǵa quqyly. Saıası partııa saılaý komıssııasynyń quramyna osy saıası partııanyń músheleri bolyp tabylmaıtyn kandıdatýralardy usynýǵa quqyly.
Otyrys barysynda 2019 jyly saılaý komıssııalarynyń quramdaryn qalyptastyrý jónindegi usynymdardyń jobasy talqylandy. Pikir almasý nátıjesi boıynsha otyrystyń barlyq qatysýshylarymen kelisilgen usynymdardy Ortalyq saılaý komıssııasy maquldady.
Ortalyq saılaý komıssııasynyń músheleri «Shymkent qalasy aýdandarynyń aýmaqtyq saılaý komıssııalaryn qurý týraly» qaýlyny biraýyzdan qabyldady.
Atalǵan qaýlymen Shymkent qalasynyń Abaı, Ál-Farabı, Eńbekshi jáne Qarataý aýdandarynda tórt aýdandyq aýmaqtyq saılaý komıssııasy quryldy.
Joldybaı BAZAR,
«Egemen Qazaqstan»
