Áskerı qyzmetshiler úshin áskerı salttar erekshe maqtanysh týǵyzady. Ákerı salttardyń biri «Batys» óńirlik qolbasshylyǵynyń barlyq áskerı bólimderinde ótkizilip, túrli laýazymdaǵy jaýyngerlerge jeke qarý men áskerı tehnıkalar senip tapsyryldy. Bul shara áskerılerdi óz qarýyn uqypty ustaýǵa, súıýge jáne jaýapty bolýǵa baýlıdy.
Qaýipsizdik erejelerin jetkizý boıynsha keshendik sabaqqa Aqtaý, Atyraý jáne Aqtóbe garnızondarynyń barlyq áskerı qyzmetshileri qatysty. Olar úshin arnaıy 13 oqý oryny ázirlendi. Bul is-sharanyń basty maqsaty – jeke quramǵa qaýipsizdik erejelerin jetkizip, órt jaǵdaılary men kúndelikti tirshiliktegi jaraqattaný jaǵdaılaryn boldyrmaý, olar oryn alǵan jaǵdaıda qajetti is-sharalardy boldyrmaý, jaýyngerlik daıarlyq, qurylys, qyzmet kórsetý jáne parktik-sharaýshylyq jumystary kezinde bolýy múmkin túrli faktorlardy eskertý bolyp tabylady.
-Búgingi kúni óńirlik qolbasshylyqtyń barlyq áskerı bólimderi jańa oqý jylyna tolyqtaı daıyn. Barlyq áskerı tehnıkalar qysqy paıdalaný jaǵdaıyna keltirildi, qujattama jáne oqý-materıaldyq baza ázir, sondaı-aq áskerı polıgondar qaýipti jarylǵysh zattardan tazartylyp, kez-kelgen jıiliktegi oqý-jattyǵýlardy ótkizýge daıyn. Áskerı bólimniń qajet deńgeıindegi qorlary qalpyna keltirildi, deıdi «Batys» óńirlik qolbasshylyǵynyń materıaldyq-tehnıkalyq qamtamasyz etý ortalyǵynyń shtab bastyǵy podpolkovnık Rýslan Kýbashev.
Qarýly Kúshterdiń aldaǵy 2019 oqý jyly Qazaqstan Respýblıkasynyń Tuńǵysh Prezıdenti kúninen keıin bastalyp, «Rýhanı jańǵyrý – jaýyngerlik rýh tiregi» uranymen ótedi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
