Maraltaı

Maraltaımen eń alǵash 1993 jyly jazda, Almatyǵa KazGÝ-ge oqýǵa tap­sy­rýǵa kelgen jyly, Abylaı han dańǵyly men Gogol kóshesiniń qılysyndaǵy «Radýga» deıtin dúkenniń jertólesinde ta­nystyq. Ortaq tanysymyz toqaılas­tyr­ǵan. Ońy men solyn tanyp úl­ger­megen jas bozbalaǵa alǵashqy dıdarlasý qyzyq áser qaldyrdy. Aqyn mazasyzdaý keıipte kórindi. Ara-tura tisin shyqyr­latyp qoıyp, kútimsizdeý qalyń buıra shashyn silkip tastap, kózin jumyp alyp óleń oqıdy eken. Kónetozdaý jasyl kástóminiń etegin temeki shoǵy oıyp tas­tapty. Kástóm túgil, bir-birine ótkel ber­meı turǵan qos qoǵamnyń etegin áleý­mettik aǵystar shaıyp jatqan alasapyran shaq edi ǵoı.

Maraltaımen eń alǵash 1993 jyly jazda, Almatyǵa KazGÝ-ge oqýǵa tap­sy­rýǵa kelgen jyly, Abylaı han dańǵyly men Gogol kóshesiniń qılysyndaǵy «Radýga» deıtin dúkenniń jertólesinde ta­nystyq. Ortaq tanysymyz toqaılas­tyr­ǵan. Ońy men solyn tanyp úl­ger­megen jas bozbalaǵa alǵashqy dıdarlasý qyzyq áser qaldyrdy. Aqyn mazasyzdaý keıipte kórindi. Ara-tura tisin shyqyr­latyp qoıyp, kútimsizdeý qalyń buıra shashyn silkip tastap, kózin jumyp alyp óleń oqıdy eken. Kónetozdaý jasyl kástóminiń etegin temeki shoǵy oıyp tas­tapty. Kástóm túgil, bir-birine ótkel ber­meı turǵan qos qoǵamnyń etegin áleý­mettik aǵystar shaıyp jatqan alasapyran shaq edi ǵoı. Buǵan deıin Maraltaı aqyn týraly elge keletin gazet-jýrnaldardan tam-tumdap qana esti­genimiz bar. Dál sol tusta Nurlan Máý­kenuly basqaratyn respýblıkalyq «Jas qazaq» gazetinde aqyn Israıl Sapar­baı­dyń «Qalam alyp hat jazdym Maral­taıǵa!» atty aqjarma jyrlary jarııa­lan­ǵan. Gazettiń kelesi sanynda aqyn aǵanyń alań jyrlaryna Maraltaı da ún qatypty.

«Qalam alyp hat jazypsyz qaǵazǵa,

Bir bet óleń baq bola ma baǵy azǵa.

Syı bola ma kúıi qashqan báńgige,

Mı bola ma aqyly azǵan sabazǵa.

Ishý kerek, siz de ishińiz, ishem men,

Keshelerdi kórip kúnde kúshengen.

Taǵdyr kelip sıpaǵansha basymnan,

Ajal kelip áketkenshe kisenmen», – dep bastalatyn toptamaǵa eldiń nazary edáýir aýsa kerek… Maraltaı áldebir sharýamen Maqataev kóshesiniń boıyn­daǵy, qazirgi «Atamuranyń» kitap basý sehy ornalasqan baspahanaǵa baratyn boldy. Shoıyn joldyń boıymen jaıaý ilbip kelemiz. «Kókbazardyń» tusyna kelgende: «Qal­tańda qara baqyr bar ma?» dedi. Edel-jedel birdeńelerdi alyp qolyna ustattym. Dittegen jerge kelgende: «sen osy qaqpa aldynda kút, men tez shyǵam», degen. Esik-terezesinen jel gýlep turǵan jańa kezeńniń kezbe aqyny sol ketkennen mol ketti…

Aýnap aı, jyljyp jyl ótti. Al­ǵash­qy talapkerlik jyldar tabysty bolmady. Emtıhan synaqtarynan eki jylda da etpettep quladyq. 1995 jyly ǵana jýrfaktyń bosaǵasynan bult seıildi. Stýdenttik bıletti qolǵa alǵan shaqta qalashyqta Maraltaı jaıly ańyz-shyny aralas áńgime gýlep tur eken. «Maraltaı molada turady-mys», «Maraltaı ishpese jaza almaıdy eken», «Maraltaı baqılyq bolypty…» Sanama sart ete qaldy. «Qudaı-aý, mynaý baıaǵy paqyryńyzdy baspahana qaqpasynyń aldyna «qaǵyp» ketken aqyn emes pe!».

…Aýdıtorııaǵa boıymyz úırenip, al­ǵashqy semestrdiń seńi buzylyp, jer laısańdana bastaǵan kóktemniń beımaza kúnderiniń birinde: «Maraltaı qala­shyq­ta júr eken», degen áńgime jetti. Bilim qýǵan birinshi kýrsqa bári tańsyq. Aıtyp aýyz jıǵansha bolǵan joq, sonaý Jambylda júrgen Maraltaı daýyldatyp, jaýyndatyp 5-shi jataqhanaǵa ki­rip keldi. Baıaǵy Maraltaımen qaıta ta­nystyq. Áne-mine oqýlaryn taýysqaly turǵan Saǵyndyq Rzahmetov, Sándi­bek Jubanııazov, Bekjan Áshirbaev, Ámirhan Bal­­qybek, Orazáli Baımurat alystan sa­ǵyn­dyryp kelgen aqyndy 307-shi bólme­de qarsy aldy. Álibek Shegebaev basta­ǵan jas jigitter «asaı-múseıdi» rettegen bop júrmiz. Juqa qaltamen jupyny ústel jaıyldy. Jataqhana azan-qazan. Birinen biri julyp áketip óleń oqı­dy. Álibek gıtaramen syzyltyp ádemi án­der­di saldy. Otyrystyń aıaǵy Maraltaı aqynnyń «benefısine» aınalyp júre berdi… Ol sýretti de sheber salady eken. Bas suqqan bólmesiniń keregesine qas pen kózdiń arasynda jalǵyz kózdi arýdyń sýretin saldy da júre berdi.

О́leńge, ónerge degen qurmeti bólek, qaýyr­syn qalamy qataıa qoımaǵan bir top jas Ma­raltaıdyń sońyna ilestik. Aýdıtorııadan mán, sabaqtan sán ketti. Al jataqhana bólmelerinde aqqý ushyp, qaz qonyp júr. …Iá, ras, Ezop pen Krylovty, Lýnacharskıı men Saltykov-Shed­rın­di jeti atamyz sekildi suraǵan jerinde saırap berip turǵan soń, Temir­bek ustaz Qoja­keevtiń de kóńili jaı. Keıde Mákeń salyp uryp aýdıtorııaǵa kirip keledi. Tipti, bir joly bizben birge Temirbek Qojakeevtiń leksııasyna kelip, artqy qatarda otyrdy. Usqyny kelmeı otyrǵan aqyndy ustaz sezip qalyp: «Myna dýdar bas aqyn qaıdan júr?» – dedi. «Jambyldan! Maraltaımyn!» – dep qysqa qaıyrdy. «Maraltaı bolsań óleń oqy!». «Aǵa, onda bul asa qıyn sharýa emes eken» dedi de óńeshin kenep qoıyp:

– Aıadaı ǵana aınalyp bolmas jasymda,

Túlkini kórgem máz bolyp kúlgen mıyqtan,

Qanshyqty kórgem qorqaýlarmenen uıyqqan,

Qartaıǵan shaqta qııadan qulap óletin,

Qyrandy kórip, kózinen sumdyq kúı uqqam – dep bastalatyn óleńin bozdatty deısiz. «Mine, joldastar, naǵyz satıra degenimiz osy!» – dep Temirbek aǵamyz aqynǵa rıza bolyp, batasyn bergen.

Maraltaı «jasaqtaryna» janashyr­lyq tanytyp, kóp keńshilik jasaǵan ustazdarymyz – belgili aqyndar Baýyrjan Jaqyp pen Temir­ǵalı Kópbaev. Sóıtip, Maraltaı kúndizgi bólim­degi jáne syrttaı oqıtyn jigitterdi ertip alyp aqyn aǵalardyń úıine joryqqa shyqty. Esim­derine syrttaı qanyq bolyp júrgen kóptegen aqyn-jazý­shylar­men sol tusta tanystyq. Ishki esep te joq emes, tanysa baryp «tabyspen» qaı­tý. 1 mamyr kúni Muratbaev kóshesin­de tura­tyn kórnekti aqyn Ulyqbek Es­dáýletti týǵan kúnimen quttyqtaýǵa shur­­­qyrap barǵanymyz esimde. Qa­la­shyq­qa jaqyn bolǵan soń ba, má­de­nıet­tanýshy hám aqyn Áýezhan Qodardyń «Ves­novkanyń» boıyndaǵy úıine san ret bardyq. Jataq komen­dantynyń kóńil-kúıi bol­maǵan kez­deri Maraltaı jaıaý-jalpylap, belsheden bal­shyq ke­ship Ábý­bákir Qaıran aqynnyń úıine tar­tady. Maral­taı­dyń meselin keri qaı­tarǵan aqyndy, sirá, kór­medik, bótekesi bos bolǵan sol bir tar kezeń – keń eken ǵoı… Bálkı, biz jolyqqan adamdardyń peıi­li kól-darııa-aý shamasy. Marqum Ǵabıden Qu­lahmettiń Maraltaıdy óbek­tep, janqaltasyna aqsha tyǵyp jat­qa­nyn san ret kórdik.

«Keńsaıdyń» qoltyǵyndaǵy uly arýaqtarǵa san ret baryp táý ettik. Álgi bir «Ádılá» deıtin áıgili aza-jyrdyń sondaı bir zırat aralap júrgen shaǵyn­da shyqqanyn aıtty Maraltaı. Tarıhyn baıandaıdy, bozdatyp otyryp oqıdy. Aza boıyńdy qaza qylady. Sondaı bir óń men tústiń ortasynda júrgen sortań kúnderde Tarazdan Maraltaıdy qazaq­tyń talantty aqyny, marqum Serik Tomanovtyń izdep kelgenin kórdik. Ol da sol býradaı býyrqanyp ketken shaǵynda óleńniń órkeshine qonyp alyp Almatyǵa tartatyn bolsa kerek.

– Aq kóńil basym, aq kóńil basym,

Toqtaý bolmaıdy-aý aqtarylǵasyn.

Jaby tirlikti jaqtan urǵasyn,

Qaıyrylmaı ketti baq-qaryndasym,

– dep baısal tartar shaǵynda shashyna qyraý baılaǵan aqynnyń jyrlaryn da tyńdadyq.

Sol bir kezeńder Maraltaı Yby­raev­tyń «Zoologııalyq termınder» men «Qyzyl óleń­niń» ortasynda sendelip, basyn tasqa da, taýǵa da soǵyp júrgen surapyl shaq, ózin de, ózgeni de aıamaı, óleńin ǵana aıalap júrgen kezi eken. «Qan men sútke ılengen» taǵdyryn jyrǵa qashap, tańǵy asy – Táńirden buıyryp júrgen shaǵy edi. Ata-anasyn, aǵa-baýyr­laryn arǵy dúnıege beımezgil shaqta attandyrǵan aqynnyń taǵdy­ryn eptep sezinip qalǵandaı boldyq. Shyn má­ninde Maraltaı óziniń taǵdyrymen de, shyǵar­mashylyǵymen de, júris-tu­ry­symen de ádebı ortany ózine jalt qaratty. Jastardyń oǵan elikteý dáýiri bastalǵandaı kórindi, bylaı qara­sańyz tipti de kisi qyzyǵatyn ómir emes. Eki jastyń birine kelmeı jaqyndarynan aıy­ryl­ǵan, túsken oqýda turaq tappa­ǵan, óz qolymen qurǵan oshaqtyń oty erte sóngen, Jambyl men Almatynyń or­tasyndaǵy kúre joldyń ańqasyn kep­tirgen kebisi jyrtyq kezbe taǵdyr kimge úlgi bolǵandaı? Biraq sol tustaǵy eń «modnyı» aqyn – Maraltaı edi. Stý­dent­ter qaýymy onyń óleńderi shyqqan basylymdy qoldan-qolǵa tıgizbeı oqydy. Demek, aıyl baýy úzilip baryp qaıta jalǵanǵan, jeke otaý qurǵanymen esigin qaı jaqtan asharyn bilmeı turǵan qoǵamnyń shyǵarmashylyq keńistiginiń jyrtyǵyn aýyr taǵdyrlar men jaqsy jyrǵa degen jan qumarlyǵy ǵana jamap tursa kerek.

Bul Maraltaıǵa sóz qaıdan qondy?

Eń alǵashqy qasıetti sóz kókten tústi. Adamzatqa baǵdarsham bolǵan – sol tórt kitap! Al, odan keıingi úlken sózdi tasqa qashaǵan uly bıleýshiler men bahadúrler – Kúltegin men Tonykók. Týǵan aı – týraǵan et, bórili baıraqty birinen biri ala qashqan jaýgershilik kezeńder ýaqyt aǵysyn jedeldetti. As­pan astyn aqyryp suraǵan Kók túrikter júzjyldyqtardyń apshysyn alańsyz qýyrdy. Altynǵa malynǵan uly babalardy arqasyna mingizgen asyl tuqymdy tulparlardyń tuıaǵymen jazylǵan tarıh jyldam aýnady. Jebe adyrnadan keri­lip úlgenshe, uly óner Maıqynyń kó­meıi­ne baryp qonaqtaǵan. Sóz ıesin tapty, joryqtar júıesin tapty. Jer betin kartasyz basyp alyp jatqan sondaı bir qııankeski shaqtarda tarıh sanasyna sóz ustaǵan qolbasshylar men abyzdar keldi. Keshegi aqyryp teńdik suraǵan Shalkıiz, Dospanbet, Aqtamberdi, Qaztý­ǵan jyraýlar men zar-zaman aqyndary solardyń sarqynshaǵy edi. Budan keıingi keptiń bári saraı mańyndaǵy tarıhshylar men ajal aýzynan aman qalyp, je­roshaǵyn qyzdyrǵan temirshi-usta­larǵa málim. At aryǵan, ton tozǵan kezeńder keldi. Jerorta teńizi men Uly qorǵan­nyń arasynda aldaspanyn qapysyz sermegen uly babalar birde qoldan, birde joldan shetinen ajal jastyǵyna bas qoıdy. Qaroıda qalǵyp ketip, qapyda basy domalap túsken sońǵy batyr-jyraý Mahambet! Beketaıdyń qumyndaǵy daýyl tynshyp, tiler­sekke tusaý, basqa noqta baılanyp, asaýlyq ádira qalǵan ólara shaqta túgel sóz Qaraýylǵa kósh túzegen. Qazaqtyń tańdaıyna bitken asyl sóz arnasyn buzyp-jaryp, aqta­rylǵan qalpy uly Abaıdyń aýlasyna kelip túnedi. Toqtatqan Qunanbaıdyń balasy. Sol Abaı jazyp qaldyrǵan jal­ǵyz kitapty ǵasyr boıy taratyp, tal­dap tarıhqa qattap ketken uly tul­ǵalarda esep joq. Atyldy, asyldy. Ne balasyz, ıa molasyz qalǵandary qansha­ma? Jan berý ońaı ma? Biriniń syrtynan biri ashyla saıraǵandaryn da zamana jeli búginge jetkizdi. О́zderi óldi, sóz­deri qaldy. Qalaı bolǵan kúnde de ult muraty jolynda ózinshe jol tapqan Alash arysta­ry­nyń báriniń arýaq­ta­ry­na myń taǵzym! Keńestiń kerzisin kıip júrip alakóleńke qoǵamda qalam ustaǵan sheberler jaıly bólek áńgime. Jalań aıaq jar keshti, qyzyl aıaq qyr keshti. Árkim óz sheberhanasynda otyryp nebir surapyl obrazdar jasady. Qyzyl úki­mettiń tarymynda júr­gen qazaq halqy­nyń arman-muratyn jyrlady, jazdy. Qazaq ádebıetiniń altyn dáýirin solar jasady. Sózdiń jigin buzbaı, butarla­maı, bura tartpaı 86-dan keıingi ur­paqqa estafetany sátti tapsyryp berdi. Árıne, bular sórede turǵandar emes, tek uly alamannyń kezekti aınaly­myn­daǵy baby árqıly júırikter edi. Keńes kúı­rep, qazaq jeke otaý qura bastaǵan qos júıeniń astań-kesteń aǵysynda turyp úlken mindet atqarǵan, biraq ádebıettegi laıyqty baǵasy áli kúnge óz deńgeıinde berilmeı kele jatqan, jýan ortasynda Nurlan Máýkenuly, Ábý­bákir Qaı­ran, Ǵalym Jaılybaı, Baýyrjan Úsenov, Bolat Úsenbaev, Svetqalı Nurjanov, Sabyr Adaı, Baýyrjan Jaqyp, Asqar Altaı, Nurǵalı Oraz, Qaırat Álimbek, Temirǵalı Kópbaev, Gúlnar Salyqbaı, Amantaı Shárip syndy belgili qalam­gerler quraǵan býynǵa degen keıingi Maraltaı Ybyraev, Jaras Sársek, Ámir­han Bal­qybek, Baýyrjan Babajanuly bas­taǵan tolqyn­nyń iltıpaty bólek bolýǵa tıis. Sebebi, ádebı prosesterdiń almasý kezindegi jaýapkershilikti osy eki býyn ótkelden ádemi alyp ótti. Saraılardyń aýzyna qara qulyp túsken shaqta óleń-sózdiń kóshin kóshege shó­gergen 90-jyl­ǵy­lar qandaı úlken ádebı mıssııa atqarǵanyn óz­deri de keıindeý sezse kerek… Jyr joryǵynda shep qur­ǵan bul qatarda Batyrbolat Aıtbolat­uly, Sándibek Jubanııazov, Qazbek Qut­ty­muratuly, Saǵyndyq Rzahmetov­tiń de esimderin qurmetpen ataýǵa tıispiz. Joryq shyǵynsyz bolǵan ba? О́leńniń ashyq teńizine shala kerilgen jelkenmen sapar shekken kezekti bir joryqta Ádil Botpanov esimdi talantty aqynnyń qaıt­paı qalǵanyn bizge Jaras Sársek aqyn aıtty… Myna bir óleń sol Maraltaı Ybyraev, Jaras Sársek, Ámirhan Balqybek bastaǵan aqyndarǵa degen qurmettiń bir sáti bolsa kerek.

Úsh oǵylan

Asqaq edik, tákappar ek ór keýde,

Qarǵyp ótken qııadan da, órden de.

Balań minez balǵyndardy qarsy alǵan,

Úsh oǵylan kórinbeıtin tórlerden.

Alǵash bizder Almatyǵa kelgende.

Jaras aqyn usynǵan-dy júregin,

Al Maraltaı aralatty jyr elin,

Joryqtarǵa jol bastady surapyl,

Ámir qaǵan Elladada júretin.

Úsh oǵylan japyraǵy tonalǵan,

Medeý kútpeı meımanasyz qoǵamnan,

Botpanovty izdep bara jatatyn,

О́leń atty planetadan joǵalǵan.

Aıyldaryn jımaı bara jatatyn,

Qalashyqty qımaı bara jatatyn.

О́leńmenen órnek salyp KazGÝ-ge,

Almatyǵa syımaı bara jatatyn.

…Jyldar ozdy, ótti ýaqyt qas-qaǵym.

Alataýdan estildi úsh asqaq ún,

Jetisýǵa úsh ózen kep qosyldy,

Al úsh ózen úsh teńizge bastady.

Jańylmady deı almaımyz útirden,

Alla jazǵan adasqan joq úkimnen,

Bózge bola daı-daı bolyp jatqanda el,

Bul úsheýi syılyqtarǵa túkirgen.

Maýsym, mamyr, sarsha tamyz, aqpanda.

Solarǵa erip tústik talaı saqpanǵa,

Shalys bassaq sol úsheýin dattańdar,

Alysqa ushsaq sol úsheýin maqtańdar.

Birin biri tastamaıtyn qaqpanǵa!

Sálem jetse Qazyǵurttan, Jaıyrdan,

Kóńil sherin «Sarybıdaımen» qaıyrǵan,

Almatyny nege súıdi sol aqyn,

Áke-sheshe, baýyrlardan aıyrǵan.

О́rgizetin ózeginen túnde óleń,

Jan jarasyn jalap jazǵan jyrmenen.

Almatydan taýyp aldy ol ózin,

О́zin izdep ketip edi Súmbeden.

Sol qalashyq, kóz de qalǵan baılanyp,

Sál júdeýleý.

Sákide otyr oılanyp.

Kenet olar aǵyl-tegil jylady,

О́zi óleńge, óleń oǵan aınalyp.

«Tolqynnan tolqyn týady», deıtin ujym­dyq jınaqtaǵy jyrlarǵa tushyna almaı júr­gende, Maraltaıdyń «Aı-Nur» atty aıdyń qıyǵyndaı ǵana tuń­ǵysh jınaǵy jaryq kórdi. Bul kitap oqyrman úshin óleń jınaǵy bol­ǵanmen, Maraltaı úshin – tólqujat dese de bolady. Qujat ataýlydan jurdaı aqyndy milıtsa san ret ustap alyp: «Qujatyń qane?» degende: «Mine», dep qoınynan «Aı-Nurdy» kórset­ke­nine talaı kýá boldyq. Ol kezdegi qyzyl ja­ǵalylarda eptep meıirim bar edi…

 Sol kitaptyń ishi tolǵan zar! Maraltaıdyń maqamymen aıtylǵan zamana zary! Jeke ba­syndaǵy taǵdyrdy ulttyq murattarǵa ushtas­tyra otyryp jyrlady. Ádemi órilgen rýhty óleńder­ge qobyz sarynyn ákelip quıdy. Ras, Maraltaı óleńge ózgeshe maqam ákeldi. Bálkim alasurǵan aqyn «taǵdyrymen ázildesip, tiresip» júrgen keı tustarda sátti pishin túzip jibergenin ózi de sezbeı qalǵan bolsa kerek.

«Tómende qaldym ǵoı,

Bıikke baǵyt baq bolar ma eken?!

Eı, alasa arman, aptyqpa!

Aqtyq pa?!

E, ony birde kirletip alǵam,

Shomylyp júrip shattyqqa»

– dep bastalatyn ádemi áýeze osy oıymyzǵa kýá-dúr. О́leńde tóńkeris jasaý ekiniń biriniń mańdaıyna buıyrǵan baqyt emes. Maraltaı tóńkerip tastady demeı­miz, biraq taǵdyrymen óleńdi, óleńimen taǵdyryn qutqaryp qaldy. Nátıjesinde ádebıet oljaly boldy.

Aqynda ókpe bolmaýy kerek. Sebebi, áde­bıet­shiler, synshylar Maraltaıǵa óz kezinde jyly sózderin az arnaǵan joq. Ádebı syn atqa minip turmasa da, sol tustaǵy sarǵaıǵan gazet tigin­dilerindegi Maraltaı týraly jazylǵan úlkendi-ki­shili maqalalar tam-tumap bolsa da aqynǵa be­ril­gen baǵa. Bizdińshe, Maral­taıdyń óleń jul­dyzy sátimen týdy. Qatar-qurby­lary­men qanat­tasa júrip shyǵarmashylyqta biraz beleske kóteril­di. Adam óz taǵdyryn qoldan jasamasa kerek. Pende balasynyń ishki ózegi erneý­siz bolsa taǵdyrekeń de túlki-bulańǵa salyp, qubylyp beredi. Abyroı bolǵanda, Maraltaı eskeksiz qaıyq se­kildi zamana jelimen qaq­paqyldanyp bara jatqan taǵdyrynyń «tilin» tapty. Bálkim, «á» dese «má» dep turǵan ıesi­nen taǵdyr da «jalyqsa» kerek. Aqynǵa aqyl aıt­qan adamda esep joq. Biri qula­ǵyna sybyrlasa, ekinshisi gazet betinde óleń arqyly muń shaqty. Qalaı bol­ǵan­da da, ony shyǵar­mashy­lyǵy ǵana qut­qaryp qaldy. Edel-jedel es jıdy, etek japty. Qalam­nyń qýaty áleýmettik taý­qymetterdiń ıiriminen shyǵa almaı júr­gen ómirdi sýyryp aldy. Memleket ózi jazǵan jyrlardyń jylýyn sezindirdi. Basyna baspana, qolyna marapat usyn­dy. Qazaqstan Jazýshylar odaǵynda áde­bı keńesshi qyzmetin atqardy. «Már­tebeli poezııa!» úlken jobasyn bastap berdi. Búginde ulttyq rýhtyń jalaýyna aınal­ǵan Qazaq radıosynda tabysty eń­bek etip júr. Mináıi minezine qara­mas­­tan, aǵalardyń alaqa­nynda keledi.

Maraltaı es jıǵan kezde qoǵam da túzele bastaǵan. Eptep ezýge kúlki úıi­retin myna bir jaıtty aıta keteıik. El táýelsizdigin alǵan alǵashqy kezeń­derde on jyldan asa «attan túspegen» Maraltaı kezekti áńgime-dúken ústin­de: «О́z taǵ­dyrymnyń qaqpaqylynda júrip esh­teńe sezbeı qalyppyn… Oı Alla-aı, zaman qatty qıyn bolǵan eken ǵoı, á», degeni…

Biz kıiz úıde týyp, kıiz úıde ósip, alty jasyna deıin elektr jaryǵyna janary shaǵy­lysyp kórmegen, zaman aǵy­sy usynǵan sońǵy ǵylymı-tehnıkalyq órkenıettiń ıgiligine ısine bermeıtin talantty aqyn, memlekettik «Daryn» jas­tar syılyǵy men halyqaralyq «Alash» áde­bı syılyǵynyń laýreaty, Prezıdenttik stı­pen­dııanyń birneshe dúrkin ıegeri Maraltaı Raı­ymbek­uly­nyń shyǵarmashylyǵyn qopara tal­dap-tarazylaýdy synshylarǵa qaldyryp, ada­­­mı bolmysy men buıyrǵan taǵdy­ryna shet push­paqtap ǵana toqtaldyq.

Janarbek ÁShIMJAN,

Memlekettik «Daryn» jastar syılyǵynyń laýreaty.