Keńseniń ashylýyna Almaty oblysyna jumys saparymen kelgen Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev pen oblys ákimi Amandyq Batalov qatysty. Jıyn barysynda jobalyq keńseniń jumysyna qatysty tárjirıbesimen bólisken «Astana – adaldyq alańy» jobalyq keńsesiniń basshysy Jazıra Jylqyshıeva elordadaǵy Saryarqa aýdany jáne № 10 emhana bazasynda júrgizilgen jobalyq jumystardy tilge tıek etti. Al Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń basshysy Serikbaı Nurǵısaev «Jetisý – adaldyq alańy» jobasynyń 3 basym baǵyty týraly aıtyp berdi.
Jalpy Almaty oblysynda sybaılas jemqorlyqpen kúres jáne onyń aldyn alýǵa baǵyttalǵan birqatar sharalarǵa jemisti jumys istep tur. Máselen, óńirde qoǵamnyń jemqorlyqqa tózbeýshiligin qalyptastyrýǵa arnalǵan úsh júzden astam shara ótkizilgen, sybaılas jemqorlyqqa qarsy 27 jedel top qurylypty. Osy baǵytta «Adal jol» jemqorlyqqa qarsy marafony uıymdastyrylǵan.
Memlekettik qyzmet sapasyn arttyrý maqsatynda oblystyq sıfrlyq tehnologııalar basqarmasy qurylyp, aýdan, qala ákimdikterinde memlekettik qyzmet monıtorıngisi bólimderi jasaqtaldy. Bul baǵytta jyl basynan beri 7,3 mln teńgege memlekettik qyzmet kórsetilse, sonyń 5,8 mln teńgesi nemese 79,4 prosenti elektrondy túrde kórsetilgen eken.
Sondaı-aq Almaty oblysyna jumys saparymen kelgen Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev Bıken Rımova atyndaǵy drama teatrynynda sahnalanǵan «Qulqynnyń quly» dramasyn oblystyń memlekettik qyzmetshilerimen jáne ýnıversıtet stýdentterimen birge tamashalap, Jastar» sport saraıynda voleıboldan ótken joldastyq kezdesýge qatysty.
Qalmahanbet MUQAMETQALI,
«Egemen Qazaqstan»
Almaty oblysy
