Qoǵamdyq damý mınıstri Darxan Káletaev byltyr qarashada «El erteńi – bolashaq jastardyń qolynda» Jol kartasynyń jobasy ázirlengenin habarlaǵan edi. Atalǵan mınıstrlik janynan qurylǵan Jastar jáne otbasy isteri komıtetiniń basshysy Ashat Razdyquly: «Jol kartasynda mınıstrlikterden bastap, barlyq múddeli memlekettik mekemelerdiń, jergilikti ákimdikterdiń, jastar saıasatymen aınalystan úkimettik emes uıymdardyń usynystary men jobalary qamtyldy. Sonymen qatar qoǵamdaǵy pikirler men áleýmettik saýalnamalardyń nátıjeleri de eskerildi. Jol kartasynyń negizgi maqsaty – ár sanattaǵy jastarǵa qoldaý kórsetý. Onyń ishinde 14-18 jas aralyǵyndaǵy mektep oqýshylary da, kolledj, ınstıtýt, basqa da JOO stýdentteri, jas otbasylar, kásipkerler men jumyssyz jastar da bar», deıdi.
Memleket basshysy: «Jastar jáne otbasy ınstıtýtyn qoldaý memlekettik saıasattyń basymdyǵyna aınalýy tıis», degen edi. Sonyń dáleli, ótken jyl jastarǵa arnalǵan jobalardyń qarqyndy qolǵa alynýymen erekshelendi. Naqty tilge tıek etetinimiz: qyrkúıek aıynan bastap 20 000 grant bólindi. 2022 jylǵa deıin 75 myń adamǵa arnalǵan jataqhanalar salynady. Bul – osynshama otbasyna kómek degen sóz. О́ıtkeni tegin bilim, stıpendııa alyp, jatyn orynmen qamtamasyz etilip, oqýyn támamdap, tabys tapqan árbir adam óz otbasyna qoldaý kórsetip, tirek bolý múmkindigin ıelenedi.
Sondaı-aq Jastar jáne otbasy isteri komıteti óz jumysyn bastady. Bul da jastarǵa júıelilik jaǵynan úlken qoldaý. «Bizdiń maqsatymyz – jastarǵa arnalǵan áleýmettik lıft platformasyn keńeıtý. Bizde júıe qalyptasqan, bala mektepti bitirgen soń, UBT arqyly grant ıelene alady, eger ony qalamasa nemese múmkindigi bolmasa, 2 jyl tegin oqytatyn kásiptik kolledjderge bara alady. Mine, bul da áleýmettik lıft», deıdi komıtet basshysy.
Komıtet ókiline «Jastar jyly jalaýlatýmen ótip ketpeı me?» degen qoǵamda týyndaǵan suraqty qoıdyq. Ol: «Jol kartasy naqty ındıkatorlarǵa toly bolady degen senim bar. Úkimet qaýlysymen bekitilgen memlekettik baǵdarlamalarǵa ár baǵyttaǵy jastar ındıkatoryn engizýdi usynyp jatyrmyz. Úkimettik emes uıymdarmen tyǵyz baılanystamyz, solarmen birlesken jumys retinde ári qoǵamdaǵy alańdaýshylyqty eskerip, paıdasyz jıyndar, forýmdar men dóńgelek ústelderden góri bizdegi sýısıd, nashaqorlyq, buzaqylyq sekildi ózekti máselelerdiń aldyn alý maqsatynda jastarǵa mańyzdy ári qyzyqtyratyn aksııalardy, marafondardy, jańa formattaǵy jumystardy uıymdastyrý josparda bar», deıdi.
Shalǵaıdaǵy jastardy da nazardan tys qaldyrmaý qajet degen oı taǵy bar. Memleket basshysy byltyrǵy Joldaýynda aýyldyq jerlerdiń áleýmettik ortasyn jańǵyrtý kerektigin aıtqan edi. Soǵan saı, «Aýyl – el besigi» atty jobany júzege asyrýdy da tapsyrǵan. Bul rette Aýyl sharýashylyǵy mınıstrligi men ózge de mekemelerdiń bastaýymen arnaıy Jol kartasy daıyndalmaq.
Statıstıka komıtetiniń málimetinshe, qazir elimizde 3 900 834 jas bar. 4 mıllıonǵa jýyq janǵa Jastar jyly berekeli bolsyn!
Aıdana ShOTBAIQYZY,
«Egemen Qazaqstan»
