Sondyqtan anam budan 20 jyl buryn jergilikti ákimdikten úı surap aryzdanyp qoıǵan bolatyn. Alaıda memleket tarapynan aýyldyq jerlerge úı salynbaýy, ózge de jaǵdaılardy tilge tıek etken basshylyq basyn aýyrta qoımady, álde máseleni sheshýge asyqpady...
Anam meken etken Mańǵystaý aýdanyna, onyń Shebir aýylyna osy jıyrma jyldyń ishinde qansha ákim aýysqan bolsa, anam osy jyldar ishinde sol ákimderge birneshe ret bardy – talaı esikti qaǵyp, talaı tabaldyryqty attap, qansha ýaqyt kezek kútip esiktiń aldynda sarylyp otyrdy! Qanshama ýádeni arqalap úmitpen úıge oraldy, qansha ret «bolmaıdy» degen aýyr sózdi estip ezilip keldi...
Bárimizdiń de qolymyzdan keler qaıran joq, ishteı mújilip júrgen bir kúni «osy «Egemen Qazaqstan» gazetiniń menshikti tilshisine habarlasaıynshy, batyldaý aralasatyn bolar» degen oımen Gúlaıym Shyntemirqyzyna telefon soqtym da mán-jaıdy aıtyp, jıyrma jyl boıy jınalǵan qujattardy tapsyrdym. Odan ári Gúlaıym tikeleı aınalysyp, aýdan ákimi J.Aıtýarovqa habarlasyp, jaǵdaıdy bilip, meni qýantty.
Bul jańalyq bizdiń otbasymyzǵa eski jyldy qorytyndylar tusta kelip jetti. Bizdiń otbasymyz Shebir aýylynan shaǵyndaý jańa úıge ıe boldy! Qýanyshymyzda shek joq. Anamnyń qýanyshy bir bólek, al biz úshin qýanǵan aǵaıyn-týys, kórshi-kólem, aýyldastar aq tilekterin arnaýda. Jańa jyldy jańa úıde qarsy alýdy jaqsylyqqa joryp otyrmyz.
Bıyl ǵasyrlyq mereıli jasynyń tabaldyryǵyn attaıtyn, halqymyzdyń nebir marǵasqa uldary qyzmet etken qarashańyraq gazet, Elbasymyzdyń ózi «Bas gazet» dep ataǵan «Egemen Qazaqstan» gazetine, onyń Mańǵystaý oblysyndaǵy menshikti tilshisi, tili ótkir, minezi týra jýrnalıst Gúlaıym Shyntemirqyzyna Tumanbaı Eńsegenov áýleti atynan alǵysymyz sheksiz. Eńbekterińiz janyp, abyroılaryńyz arta bersin. Halyqtyń gazeti, halyqtyń janashyry ekendikterińizdi taǵy bir dáleldedińizder! Jańa jyldaryńyz qutty bolsyn, eldiń yqylasyna bólenip, alǵysyn arqalap alǵa basa berińizder, Bas gazet ujymy! Sondaı-aq «Egemen Qazaqstan» gazeti arqyly úlkendi qurmettep, aýylǵa kelip, kiltti óz qolymen tapsyrǵan Mańǵystaý aýdanynyń ákimi Jarmaǵanbet Aıtýarovqa, Shebir aýylynyń ákimdigine, jergilikti telearna jýrnalısi Marjan Medıevaǵa otbasylyq alǵysymyzdy joldaǵym keledi.
Nurgúl EŃSEGENOVA
Mańǵystaý oblysy,
Mańǵystaý aýdany
