Qazirgi ýaqytta Qazaqstanda 28 kommersııalyq bank bar. Byltyr olardyń sany 33 bolatyn. Keıbir qarjy ınstıtýttary jumysyn tolyq toqtatty. Al eki iri bank birikti. Bıyl Ulttyq bank táýekel máselesine erekshe kóńil bóletin bolady.
«Baqylaý prosesi kezinde biz qarjy uıymynyń Qazaqstannyń zań talaptaryn qanshalyqty saqtap otyrǵanyn tolyq zertteımiz. Bıznes-modelderine saraptama jasaımyz. Korporatıvti basqarýdaǵy táýekelder baǵalanady. Qıyn jaǵdaı týyndaǵan kezde ony sheshý úshin kapıtaldary jetkilikti me? Bul da basty nazarda bolady. Osyndaı baqylaý tetikteri máseleni ýshyqtyrmaı, erte kezde retteýge múmkindik beredi», - dep habarlaıdy QR UB EDB qadaǵalaý departamentiniń ókili Danııar Nurmanov.
Basqasha aıtsaq, retteýshi ekinshi deńgeıli bankterdiń klıentteri qaryzdaryn óteı almaǵan jaǵdaıda bank óz qarjysy esebinen nesıeni jaba ala ma, osy jaıynda da saraptama jasaıdy.
«Mindettemelerdi májbúrli qaıta qurylymdaý qıyndyqqa tap bolǵan nemese múldem jaǵdaıy aýyr tólem qabileti joq bankterge qatysty qoldanylady. Osy qural iri kredıtorlar men kepildendirilmegen depozıtarıılerge kapıtalyn nemese kapıtalynyń bir bóligin qaıtaryp alýǵa jáne bank abyroıyn saqtap qalýǵa múmkindik beredi», - dedi Danııar Nurmanov.
Sondaı-aq táýekelderge beıimdelgen baqylaý júıesi aıasynda Ulttyq bank zań sheńberinde qarjy ınstıtýttarynyń top-menedjmentin tekserý quqyna ıe bolyp otyr.
«Ulttyq bank týraly zańda bul mehanızmniń erejeleri tolyq jazylǵan. Ol jarııaly túrde júredi. Jáne de ýákiletti organnyń sheshimine baılanysty shaǵymdanýǵa qarjy ınstıtýttarynda jetkilikti ýaqyt bolady», - deıdi spıker.
Mundaı qadaǵalaý ekinshi deńgeıli bank top-menedjerleriniń burys is-áreketteriniń aldyn alýda tıimdi. Sonymen qatar táýekelderdi basqarýdy baǵalaý jáne bankterdiń ishki baqylaý júıesiniń qaǵıdalary ózgeredi. Sarapshylardyń pikirinshe, bul tetikter keleńsiz jáıtterden saqtanýǵa jáne memleket shyǵynyn azaıtýǵa múmkindik beredi.
