Al Ekibastuzdaǵy «Bogatyr Kómir» JShS-niń kómir kenishterinen jyl basynan beri josparlanǵan 40,7 mıllıon tonnanyń ornyna 44,5 mıllıon tonna kómir jóneltildi. Eksport kólemi 9,4 mıllıon tonnany quraıdy.
Sonymen birge, seriktestikte kommýnaldyq-turmystyq kómirdi (KTK) jóneltý de tutynýshylardyń tapsyrystaryna sáıkes josparly túrde iske asyrylýda.
KTK boıynsha 2018 jylǵa arnalǵan jyldyq jospar 1 mıllıon tonnany qurasa, jospar 25 qyrkúıekte oryndaldy.
О́tken jyldyń jeltoqsan aıynyń sońynda seriktestik Ekibastuz kómirin paıdalanatyn aýyldyqtarǵa, aýyldaǵy shaǵyn qazandyqtarǵa 1,51 mıllıon tonnany quraıtyn turmystyq-kommýnaldyq kómir satyldy.
Aldaǵy ýaqytta kómir óndiretin kásiporyn ónimdilik pen básekege qabilettilikke jetkizetin sandyq júıege kóshirpekshi.
Bul kúnderi kásiporynda taý-ken jabdyqtaryn jóndeýdi basqarý men baqylaýdyń, josparlaýdyń avtomattandyrylǵan júıesi engizilgen.
Eki jyldyń ishinde «Severnyı» kenishinde ónimdiligi jylyna 2 mıllıon tonnaǵa deıin kómir óndiretin keshen salý, sondaı-aq, jerseriktik júıeni qoldaný arqyly taý-ken kóliktik keshenin dıspetcherlik basqarýdyń avtomattandyrylǵan júıesin engizý jobasyn iske asyrý josparlanǵan.
Sonymen birge, taý-ken jabdyqtaryn: ekskavatorlardy, tehnologııalyq kólikti, býldozerlerdi, burǵylaý bildekterin jańartýdyń 10 jyldyq merzimge eseptelgen baǵdarlamasy qabyldandy.
Al «Samuryq-Energo» AQ – iri elektr energetıkalyq holdınginde energııa óndiretin kásiporyndarǵa arnalǵan elektr energııasy naryǵyndaǵy jańa erejeler bekitilýde.
Holdıngtiń qyzmeti elektr jáne jylý energııasyn óndirý, elektr energııasyn jetkizý, bólip-taratý jáne satý, energetıkalyq kómir óndirý.
Holdıngtiń quramyna bizdiń óńirden energııa jáne kómir óndiretin «Ekibastuz GRES-1» JShS, «Ekibastuz GRES-2 stansalary» AQ, «Bogatyr Kómir» JShS enedi.
2019 jyldyń 1 qańtardan bastap, óndirýshi jabdyqtyń tozý deńgeıin qysqartý maqsatynda, elimizde qýat naryǵy qoldanysqa engizildi. Bul maqsat-jańa energııa kásiporyndaryn qurýǵa, jumys istep turǵandaryn jańǵyrtýǵa jáne qaıta qurýǵa múmkindik beredi.
О́tken jyly jeltoqsanda elimizde Biryńǵaı elektr energetıkalyq júıesiniń (BEJ) Soltústik jáne Ońtústik aımaqtary boıynsha Elektr qýatynyń ortalyqtandyrylǵan satylymy ótti.
Saýda-sattyq elektr energııasy naryǵynyń elimizdegi operatory «EQRQO» AQ-tyń saýda alańynda júrgizildi. Soltústik jáne Ońtústik aımaqtaryn baılanystyratyn elektr jetkizý jelileriniń ótkizý qabiletin eskere otyryp ótkizildi.
Qýattyń ótkizilgen saýda-sattyq nátıjeleri 2019 jyly «Samuryq-Energo» AQ energetıkalyq jabdyǵynyń úzdiksiz jumys isteýin qamtamasyz etý maqsatynda tolyqqandy ınvestısııalyq jumys júrgizýge múmkindik beredi
Satylym barysy elektr energııasy naryǵynyń saýda alańynda júrgizilip, oǵan elimizdiń «Samuryq-Energo» AQ-tyń negizgi óndirýshi 5 kásiporny: «AlES» AQ, «Ekibastuz GRES-1» JShS, «Ekibastuz GRES-2 stansalary AQ, «Shardara SES» AQ jáne « Moınaq SES» AQ qatysty.
Farıda BYQAI,
«Egemen Qazaqstan»
PAVLODAR
