Atalmysh kezdesý Kanadanyń Vankýver qalasynda ótkizildi. Eki kún buryn bizdiń jastar atalmysh qarsylasyn 4:3 esebimen tize búktirdi. Erejege sáıkes eki quramanyń biri eki márte jeńiske jetse sol jeńimpaz aldaǵy álem chempıonatynda top-dıvızıonda oıyn kórsetý múmkindigine qol jetkizedi.
Esterińizge sala ketelik, Qazaqstan jastary buǵan deıin V tobynda synǵa tústi. Toptyq kezeńde bizdiń jastar barlyq kezdesýinde qarsylastaryna ese jiberdi. Atap aıtqanda, aldymen Fınlıandııadan 0:5 esebimen jeńilse, odan keıin AQSh-tan 2:8 esebimen utylyp qaldy. Jastarymyz úshinshi kezdesýde Slovakııadan 2:11 esebimen oısyraı jeńilse, sońǵy oıynda Shvesııaǵa 1:4 esebimen jol berdi.
Danııa jastary da barlyq oıynda jeńilistiń ashy dámin tatty. Olar aldymen Kanadadan 0:14, Reseı, Shveısarııa, Chehııadan 0:4 esebimen jeńilip qaldy. Osylaısha A tobynda sońǵy oryndy mise tutty. Danııa quramasy byltyr da top-dıvızıonnyń jubanysh kezeńinde oınady. Ol joly Belarýs jastaryn 5:4, 3:2 (býllıtten) esebimen jeńdi. Osylaısha top-dıvızıondaǵy ornyn saqtap qaldy.
Bul kezdesý bizdiń jastar úshin sátti bastaldy. Olar oıyn basynan shabýyl tizginin qolǵa alýǵa tyrysty. Alǵashqy shaıba nebári 35-sekýndta soǵyldy. Ony Saıan Danııar oryndady. Al 4-mınýtta Qazaqstan eki shaıba aıyrmasymen alǵa shyqty. Ol Davyd Makýskııdiń enshisine jazyldy. Ekinshi kezeńde qos quramanyń da esepti ózgertýge múmkindigi bolǵan edi. Ásirese, Danııa jastarynyń belsendiligi aıqyn ańǵarylyp turdy. Degenmen olarǵa bizdiń hokkeıshiler laıyqty deńgeıde toıtarys bere bildi. Keıbir sátte qaqpashymyz Demıd Eremeev sheberligin kórsetti.
Úshinshi kezeńde danııalyqtar alǵa umtyldy. Degenmen olarǵa qarsy qorǵanysta bizdiń jastar saýatty oıyn kórsete bildi. Sońǵy mınýttarda Danııa quramasy qaqpashysyz oınaýǵa, ıaǵnı ony altynshy hokkeıshige almastyrýǵa májbúr boldy. Osyny paıdalanǵan bizdiń jastar olardyń qaqpasyna eki shaıba soǵyp ketti. Aldymen 59-mınýtta Artýr Gatııatov osylaısha eki shaıba soqty. Esep 4:0. Qazaqstan jastary jeńiske jetti. Qarsylasyn qatarynan eki márte tize búktirgen quramamyz endi úshinshi oıyn ótkizbeıtin boldy. Aldaǵy álem chempıonatynda olar top-dıvızıonda oıyn kórsetedi. Jarys erejesi boıynsha eki márte jeńiske jetken qurama úzdikter qataryndaǵy óz ornyn saqtap qalady.
Álem chempıonatynda Qazaqstan jastar quramasy sapynda qaqpada Eremeev Demıd, Karataev Denıs, Nýrek Vladıslav, qorǵanysta Danııar Samat, Orehov Valerıı, Shınkareskıı Evgenıı, Musabaev Ernar, Hrıpkov Iаroslav, Korolev Artem, Muratov Davıd, shabýylda Danııar Saıan, Gatııatov Artýr, Makýskıı Davyd, Vereshagın Ivan, Jorabek Aıdos, Muratov Batyrlan, Boıko Oleg, Gýseınov Dıas, Mýsorov Maksım, Býıalskıı Andreı, Dıomın Rýslan, Mıtenkov Dmıtrıı, Tretıakovskıı Danıl qorǵady. Olar «Snejnye barsy», «Altaı-Torpedo», «Temirtaý» jáne «Altaı» komandalarynda oınaıdy.
Elimizdiń 20 jasqa deıingi jastar quramasy álem chempıonatyna 1993 jyldan beri qatysyp keledi. Shırek ǵasyrdan beri bizdiń hokkeıshiler ártúrli dıvızıonda baq synady. Bizdiń hokkeıshiler top-dıvızıonda 1998-2011, 2008-2009 jyldar aralyǵynda synǵa túsken. Byltyr Fransııada ótken birinshi dıvızıonnyń A tobynda kósh bastap, úzdikter qataryna segiz jyldan astam ýaqyttan keıin qaıta oraldy. Fransııa jerinde overtaımda Germanııany 3:2, býllıtten Latvııany 3:2, Vengrııany 5:3, Avstrııany 3:2 jáne Franııany 6:1 esebimen tize búktirdi.
Aıta keterligi, búgin jartylaı fınal oıyndary da ótedi. Onda Reseı men AQSh, Fınlıandııa men Shveısarııa jastary kezdesedi. 2019 jyldyń 2 qańtarynda ótken shırek fınalda Reseı Slovakııadan 8:3, AQSh Chehııadan 3:1, Fınlıandııa Kanadadan 2:1, Shveısarııa Shvesııadan 2:0 esebimen basym tústi.
