Tarıf oblys qalalary men aýdandarynda tómendeı bastady. Jylý baǵasy 14, aýyz sý men kanalızasııa tarıfy 10 prosentke deıin arzandady. Al elektr energııasyn jetkizý 8 prosentke deıin tómendedi.
Oblystaǵy barlyǵy 3458 kóp qabatty turǵyn úıdiń 2145-n 228 jeke menshik páter ıeleriniń tutynýshylar kooperatıvteri basqarady. Qazir birqatar JPITK tarıfterdi tómendete bastady. Ol Rýdnyı, Qostanaı qalalary men Jitiǵara, Qostanaı aýdandarynda erekshe baıqaldy.
«Mysaly Rýdnyı qalasyndaǵy «Spýtnık» kooperatıvi tarıfty 5 prosentke tómendetti.Taǵy da 31 kooperatıv tarıfti tómendetýdi qańtar aıynyń aıaǵyna josparlap otyr.Al Jitiqara qalasyndaǵy barlyq kooperatıvter tarıfti birdeı deńgeıde 3 prosentke, Qostanaı aýdanynda 8 prosentke arzandatty» dedi Dáýren Asqarov.
Alaıda tarıftyń tómendeýi oblysta barlyq aýdan men qalalarda birdeı emes. Lısakov qalasynda tek bir kooperatıv ǵana 3 prosentke tómendetken. Qalǵany turǵyndar jıynynan keıin belgili bolatynyn aıtyp otyr. Oblys ákimi Arhımed Muhambetov jumysty áli de shıraq júrgizý kerektigin aıtty.
«Tarıfty burynǵy deńgeıinde qaldyryp otyrǵan jekemenshik páter ıeleri tutynýshylar kooperatıvterimen jumys júrgizý kerek. Lısakov qalasynda bir ǵana kooperatıv tarıfty tómendetken, al qalǵany qashan oryndaıdy? Bul tapsyrma qazan aıynda berilgen. Jumys nashar júrip jatyr degen sóz. Turǵyndar, ásirese, aldymen zeınetkerler, halyqtyń áleýmettik az qorǵalǵan bóligi aqshanyń únemdelgenin sezinýi tıis» dedi Arhımed Begejanuly.
Názıra Járimbet,
«Egemen Qazaqstan»
Qostanaı
