«Taılandtaǵy daýyldyń beti qaıtty. Ol Taılandtyń Krabı provınsııasy men Phýket aralyna 4 qańtardan 5 qańtarǵa qaraǵan túni jetti. Tańerteń quıyn soltústik-batysqa qaraı oıysyp, Andaman teńizine qaraı ketti. Taıland kýrorttarynda tynyǵyp jatqan Qazaqstan azamattary zardap shekken joq. Otandastarymyzdan shaǵym túsken joq. Bizdiń dıplomattar jaǵdaıdy erekshe baqylaýda ustap otyr», - dep atap ótti Aıbek Smadııarov.
Taı bıliginiń boljamynsha, jańbyrly aýa raıy áli de birneshe kún saqtalady. Keı aýdandar sý astynda qalyp qoıǵan. Osyǵan baılanysty QR Syrtqy ister mınıstrligi qazaqstandyqtardy barynsha abaı bolyp, sýdan saqtanýǵa shaqyrady. Asa úlken qajettilik bolmasa, kýrorttan tys jerlerge shyqpaǵan jón.
Aıta ketý kerek, qazaqstandyq BAQ-ta jarııalanǵan eskertpeden keıin kóptegen otandastarymyz dıplomattarmen baılanysqa shyǵyp, óz koordınattaryn qaldyrǵan. Elshilik olarmen tyǵyz baılanysta jumys istep, barlyq qajetti kómekti kórsetýge ázir.
