Sondaı-aq qańtarda qala mańyndaǵy baǵyttar qataryn arttyra túsken «Túrkistan-Shymkent» júrdek poıyzy jolǵa shyqty. Iаǵnı Elbasy tapsyrmalary sheńberinde jańa oblys ortalyǵymen jol-kólik baılanysy jaqsara túsýde.
Júrdek poıyzdyń alǵashqy saparyna arnalǵan saltanatty rásimde Túrkistan oblysy ákiminiń birinshi orynbasary Qaırat Núkenov poıyz Shymkent qalasynan qonys aýdaryp, eńbek etip kele jatqan oblystyq basqarmalar men departamentter qyzmetkerleriniń qatynaýyn jeńildetetinin atap ótti. Túrkistan men úshinshi megapolıs arasyndaǵy baılanysty nyǵaıtyp, sondaı-aq týrızmniń damýyna úles qosatynyna senim bildirdi. Júrdek poıyz ázirge aptasyna 2 ret, dúısenbi men juma kúnderi qatynaıdy. Jol júrý ýaqyty – 2 saǵat 15 mınýt. Poıyzdaǵy jalpy oryn sany – 175. Vagondar qazirgi zamanǵy jylytý jáne salqyndatý júıesimen, múgedekterge arnalǵan kótergish qurylǵylar jáne oryndarmen jabdyqtalǵan. Jolaqysy - 609 teńge, jedel poıyz Arys stansasyna ǵana toqtaıdy.
«Qala mańyndaǵy tasymal» AQ-nyń bas dırektory Muhtarbek Súleımenovtiń aıtýynsha, osy jyldan bastap aptasyna 5 ret qatynaıtyn áleýmettik mańyzy bar Túrkistan–Badam jáne Túrkistan–Saryaǵash baǵyttary iske qosylyp otyr. Túrkistan–Badam poıyzynyń jol júrý ýaqyty 3 saǵat, kompanııa bul baǵytty Shymkent qalasyna deıin uzartýdy josparlaýda. Al Túrkistan–Saryaǵash baǵyty jańa ákimshilik ortalyqty oblystyń ońtústik aýdandarymen baılanystyrady.
Ǵalymjan ELShIBAI,
«Egemen Qazaqstan»
Túrkistan oblysy
