Oǵan Qazaqstan Respýblıkasy Bilim jáne ǵylym mınıstrliginiń Ǵylym komıteti, A.Baıtursynov atyndaǵy til bilimi ınstıtýty qoldaý kórsetti. Bul qanatqaqty jobaǵa qandastarymyz Reseıdiń Orynbor, Saratov, Omby, Astrahan, Altaı, Máskeý, Ekaterınbýrg, Chelıabi, Iаroslavl sekildi ár shalǵaıynan qatysyp, Abaı óleńderin oqydy. Baıqaýdyń sharty boıynsha, olar Abaı óleńderin beıne taspaǵa jazyp, kópshilikke usyynp otyrdy.
«Mundaı baıqaý Reseı qazaqtary arasynda buryn-sońdy bolǵan emes. Onyń eki ereksheligin atap aıtqym keledi. Aldymen, biz órkenıettiń jetistigin paıdalandyq. Keń baıtaq Reseıdiń túkpir-túkpirinde turyp jatqan aǵaıyndar Abaıdyń óleńderin beıne taspaǵa jazyp, jiberdi. Ony reseılik jáne odan tys jerdegi qazaqtar ınternet arqyly kórip otyrdy. Ekinshiden, qandastarymyz jınaqy turyp jatqan Orynbor, Saratov, Omby sekildi oblystardan qazaqtar belsene qatysty, aýyzbirshilik tanytty. Qazylar alqasy da qorytyndy shyǵararda telefon baılanysy arqyly kópshiliktiń pikirin bilip, olardy eskere otyryp, jeńimpazdy anyqtady» deıdi Sáýle Sovhozqyzy.
Baıqaýǵa qatysý úshin jas ereksheligine shekteý bolǵan joq. Aǵa urpaq ókilderinen bastap, kishkentaı balalarǵa deıin Abaı óleńderin oqydy. Tipti ózge ult ókilderi de Abaı óleńin aıtpaı tura almady. Sonyń ishinde Iаroslavl oblysyndaǵy Poshehone selosyna Qazaqstannan qonys aýdarǵan Iýrıı Tkachevskıı degen jigit Abaı óleńin oqyǵanda uly aqynnyń qandastarynan asyp tústi.
«Bala kezimde Abaıdyń óleńderin atam erekshe unatatyn edi. Men uıqyǵa jatarda Abaı óleńderimen kóz iletin edim» dep aqynnyń óleńderin múltiksiz oqı jóneldi. Baıqaý qorytyndysynda Máskeý qalasynda turatyn aqyn Jarqyn О́tesheva bas bolǵan qazylar alqasy Iýrııdi úzdik dep tanydy. Sonymen qatar Saratov, Orynbor, Omby, Sverdlov oblystarynan qatysqan talapkerlerdiń de eńbegi atalyp ótti.
«Reseı qazaqtary úshin bul óner jarysynyń mańyzy erekshe boldy. Bul bárimizdiń jeńisimiz! Osylaı, bir kisiniń balasyndaı ár isti birge tyndyrsaq, biz almaıtyn qamal joq. Baýyrlarym, biz myqtymyz! Biz ana tilimizdi súıemiz! Osylaı alǵa umtyla bereıik!» dep aqyn aǵaıynǵa aqjarma qýanyshyn jazyp jatty. Baıqaý júldesine tigilgen Orynbordyń túbit shálisi Iаroslavl qalasyna jol tartty. Sonymen qatar belsendi qatysýshylarǵa uıymdastyrýshylardyń Qurmet gramotasy da poshta arqyly jiberiletin boldy.
Orynbor oblysy qazaqtarynyń kóshbasshysy Sáýle Táıkeshevanyń aıtýynsha, aldaǵy ýaqytta bul joba jalǵasyn tabatyn bolady. Endigi kezek «Batyrlar jyry» epostaryna beriledi. «Batyrlar jyrynan» úzindi jattap, ony beıne taspaǵa jazý, ony kórermenge usyný bir aı boıy júredi.
Názıra JÁRIMBET,
«Egemen Qazaqstan»
Qostanaı
