Taý-shańǵy kesheniniń jalpy aýmaǵy 85 gektar jerdi alyp jatyr. Teńiz deńgeıinen 1500-1800 metr bıiktikte ornalasqandyqtan syrǵanaqqa taptyrmaıtyn oryn.
Munda shańǵy, skeıtbord, úrlengen kameralarmen de syrǵanaýǵa bolady. Demalýshylardyń qaýipsizdigin saqtaý úshin barlyq jaǵdaı jasalǵan. Tóbeden tómenge quldılap túsýge arnalǵan 15 arnaıy jolaq salynypty. Al taý basyna arnaıy arqan jolmen kóterilýge bolady. Keshenniń taǵy bir erekshe maqsaty, demalýshylardy shańǵy tebýge úıretýmen de aınalysady. Iаǵnı, kásibı shańǵyshylardyń jeke mektebi uıymdastyrylǵan. Yntaly adamnyń taýdan syrǵanýdyń qyr-syrynan bólek shańǵy sportynyń da qupııalaryn úırenýine bolady. Qysqasy, Almaty sııaqty alyp megapolısten qol sozymda ashylǵan jańa keshen óńirdegi týrızmniń damýy men turǵyndardyń salamatty ómir saltyn ustanýǵa tolyq múmkindik bermek.
«Oıqaraǵaı - Lesnaıa skazka» taý-shańǵy kesheni memleket pen jekemenshik áriptestigi nátıjesinde salynyp, paıdalanýǵa berilip otyr. Demalys orynyn ashýdy «Alina» kompanııalar toby bastama etip kótergen bolatyn. Keshenniń zamanǵa saı bolýyna «Qazaq Týrızm» ulttyq kompanııasy men avstrııalyq mamandar úles qosty.
- Elbasy Almaty oblysyna kelgen saparynda týrızm klasterin qalyptastyrý týraly tapsyrma bergen edi. Sonyń ishinde Shymbulaqtan bastap Túrgen shatqalyna deıingi aralyqta taý týrızmin damytý qajettigin aıtqan bolatyn. Soǵan baılanysty búgin, mine, jańa taý-shańǵy keshenin ashyp otyrmyz. Memleket tarapynan qoldaý kórsetilip, respýblıkalyq mańyzdaǵy avtokólik jolynan keshenge deıingi 6,2 km jolǵa kúrdeli jóndeý jasadyq. Osy taý-shańǵy kýrortyna ınvestor óziniń jeke qarajaty esebinen 60 mln AQSh dollaryn quıdy. Bul - otbasymen kelip, taýdyń taza aýasymen tynystap, shańǵy teýip, syrǵanap, demalýǵa taptyrmaıtyn oryn, - dedi shańǵy kesheniniń ashýlýyna arnaıy kelgen aımaq basshysy Amandyq Batalov.
Aıtpaqshy, «Oıqaraǵaıdyń» qyzyǵy qyspen birge aıaqtalmaıdy. Keshen jaz mezgilinde de qyzmet kórsete beredi. Jer qarada shańǵy joldary velosıped tebetin dańǵylǵa aınalyp, taý arasyndaǵy demalysty qyzdyra túspek. Ol úshin de qolasıly jaǵdaı bar. Qazir munda 6 meıramhana, 99 oryndyq qonaq úı qyzmet kórsetýge kiristi.
Qalmahanbet MUQAMETQALI,
«Egemen Qazaqstan»
Almaty oblysy
