– Búgin búkil Qazaqstan, barlyq konfessııalar men etnostardyń ókilderi osy meıramdy atap ótip jatyr. Bul mereke meıirimdilik pen baq-berekeniń sımvoly sanalady. Osy kúni eski ókpe-renishter umytylyp, muqtaj jandarǵa kómek kórsetilip, duǵa oqylady, – dedi Qazaqstan Prezıdenti.
Elbasy táýelsizdiktiń alǵashqy jyldarynan bastap memleketimizdiń etnosaralyq jáne konfessııaaralyq kelisimdi nyǵaıtý jónindegi jumystardy júrgizip jatqanyna toqtaldy.
– Biz birligimizdiń arqasynda ekonomıkada jáne halqymyzdyń ál-aýqatyn arttyrý isinde zor jetistikke jettik. Men egemendik jyldary ishinde pravoslav hrıstıandarynyń qoldaýyn sezindim, sol úshin sizderge rızashylyq bildiremin, – dedi Memleket basshysy.
Sondaı-aq, Nursultan Nazarbaev elimizdiń jer betindegi beıbitshilik pen tynyshtyqty saqtaýǵa baǵyttalǵan jahandyq dinaralyq dıalogty damytý isindegi rólin atap ótti.
– Bul kúnderi barlyq pravoslav qaýymy Jaratýshydan jaqyndaryna densaýlyq pen amandyq, elimizge tynyshtyq, beıbit ómir men kelisim tileıdi. Osy duǵa-tilekterdiń bári qabyl bolsyn! Barshańyzdy Rojdestvo merekesimen taǵy da quttyqtap, sizderge zor densaýlyq pen baq-bereke tileımin! – dedi Qazaqstan Prezıdenti.
Memleket basshysy Qazaqstannyń birlik pen beıbitshiliktiń arqasynda ǵana jańa tabystarǵa qol jetkizetinin aıtty.
– Biz dostyq pen ózara túsinistikti, bir-birimizge degen senimdi nyǵaıtýǵa baǵyttalǵan saıasatymyzdy jalǵastyratyn bolamyz. Osyndaı bastamamamen ǵana alǵa ilgerilep, bolashaq urpaqtyń jaıly ómir súrýine qolaıly jaǵdaı jasaı alamyz, – dedi Nursultan Nazarbaev.
Sońynda Qazaqstan Prezıdenti Pravoslav Shirkeýi Rýhanı-mádenı ortalyǵynyń din jolynda qurban bolǵandar men din taratýshylar mýzeıiniń ekspozısııasyn aralap kórdi.
