Kóne Taraz, áıgili Áýlıeata aımaǵynda týrızmdi damytý arqyly áli de zertteýdi qajet etetin, tanytýdy kereksinetin jerler bar. Bul oraıda Áýlıeata óńirine kelgen árbir týrıst kóne meken týraly tyń derekterdi taba alatyn jaǵdaıda bolýy kerek. Iаǵnı, týrıster Tarazdan tańdaǵanyn tabýy tıis. Degenmen, óńir boıynsha týrısterdiń kómekshisine aınalýǵa tıis delinetin týrıstik saıttyń jumysy qazir kóńil kónshitpeı tur. «Taraz-Týrızm» týrıstik aqparattyq ortalyǵymen qurylǵan saıt negizinen tehnıkalyq sharttary boıynsha qazaq, orys, aǵylshyn jáne qytaı tilderinde jumys isteýi qajet bolatyn. Atalǵan tórt til boıynsha bul saıttan munda kelýshi týrıster ózine keregin taba alýy tıis edi. Alaıda, búgingi tańda bul keleńsizdikke sheteldik meımandar túgili, jergilikti týrızm salasynyń ókilderiniń ózi narazy bolyp otyr. Atalǵan másele týrasynda Jambyl oblystyq kásipkerler palatasynda Jambyl týrıstik ındýstrııa qaýymdastyǵy basshylyǵynyń qatysýymen otyrys ta ótkeni belgili.
«Memleket basshysy kez kelgen óńir úshin eń perspektıvaly tabys kózderiniń biri – otandyq týrızm jáne ony ári qaraı damytý kerektigin aıtty. Bul tabysty salaǵa memleket tarapynan qoldaý da eselengen. Endi Jambyl oblysy sheteldik meımandar úshin týrıstik baǵyt retinde tanylýyna qajetti jaǵdaı jasaýymyz qajet. Kelýshiler birinshi kezekte aqparatpen qamtamasyz etilýi kerek. Olar baratyn marshrýt qandaı, óńirde qandaı týrıstik nysandar bar degen sııaqty ólkeniń tarıhı oryndary men tanymdy jerleri týraly aqparat alý – basty másele. Bul turǵyda oblysta alǵash ret týrıstik saıttyń qurylǵandyǵy kásipkerler palatasy men týrızm janashyrlary úshin jaǵymdy jańalyq boldy. Alaıda, qazirgi tańda bul saıttyń jumysy turalap tur», deıdi Jambyl oblysy kásipkerler palatasy dırektorynyń orynbasary Aspandııar Seısebaev.
Sonymen qatar Aspandııar Seısebaev kezinde bıýdjettiń esebinen qurylǵan týrıstik «Taraz tour» saıtynyń durys ári úzdiksiz jumys isteýine kásipkerler palatasynyń mamandary qajetti kómekti tegin usyna alatynyn da aıtyp otyr. Al Jambyl oblystyq týrızm basqarmasynyń bólim basshysy Jomart Hajynyń aıtýynsha, saıttyń jumysy qazirgi tańda pysyqtalý ústinde eken. Sonymen qatar ol tehnıkalyq erekshelikke sáıkes týrıstik saıttyń jumysyn sapaly jańartý boıynsha uıymdastyrý is-sharalary júrgiziletinin, týrıstik áleýetke baı óńirimizde týrızm salasyn tanymal etý maqsatynda túrli deńgeıdegi is-sharalar uıymdastyrylyp turatynyn jetkizdi.
«Máselen, Tarazda jýyrda ǵana qalyń buqaranyń basyn qosqan «Aspara fashion week», «Food tourism-2018» sııaqty is-sharalar joǵary deńgeıde ótti. Aldaǵy ýaqytta týrıstik baǵyttaǵy is-sharalardy ýaqtyly jáne sapaly ótkizý maqsatynda jáne konkýrstyq qujattamany daıyndaý kezinde usynystar engizý úshin óńirlik kásipkerler palatasyn, jergilikti týrıstik ındýstrııa qaýymdastyǵyn aldyn ala habardar etý qajet», deıdi Jambyl týrıstik ındýstrııa qaýymdastyǵynyń tóraıymy Valerııa Batýeva.
Jalpy, táýelsizdik jyldarynda Áýlıeatanyń mádenı tarıhynda da aıtarlyqtaı oqıǵalardyń oryn alǵany ras. Máselen, osy ýaqyttarda IýNESKO-nyń búkilálemdik muralar tizimine Áýlıeata óńirinen bes birdeı tarıhı nysannyń engeni belgili. Atalǵan nysandar búginde álem qyzyǵa qaraıtyn qundy qazynalar qatarynan sanalady. Endigi jerde IýNESKO nysanyna Jambyl oblysyndaǵy «Balasaǵun» qalashyǵy men «Sháýshen» kesheni enetin boldy. Bul oraıda atalǵan týrıstik nysandardyń ınfraqurylymy máselesine kelsek, qazirgi kezde jobalyq-smetalyq qujattamany ázirleýge qarajat bar eken. Endi memlekettik-jekeshelik áriptestigi sheńberinde «Sháýshen» keshenine avtojol qurylysyn qarjylandyrý tizbesi Jambyl oblystyq jolaýshylardy tasymaldaý jáne avtokólik joldary basqarmasyna usynylýda.
Bar nárseni kórsete bilýdiń de mańyzy orasan. Búginde Jambyl oblysynda týrızm salasyna tıisti kóńil bólinýde. Tek týrıster úshin onyń jarnamasynyń jartymsyzdyǵy, saıt jumysynyń turalap turýy qolaısyz, árıne.
Hamıt ESAMAN,
«Egemen Qazaqstan»
Jambyl oblysy
