Oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenovanyń málimdeýinshe, oblys óńirinde ózin-ózi jumyspen qamtyǵan turǵyndar sany 38 myń bolady. Sonyń ishinen 26 myń adam ózin-ózi jumyspen beıresmı qamtyǵan dep moıyndaldy. Osy adamdarmen Biryńǵaı jıyntyq tólem tóleýdi engizý úshin túsindirý jumystaryn júrgizý josparlanyp otyr. Ol úshin basqarma qyzmetkerleri buqaralyq aqparat quraldary arqyly turǵyndarǵa qulaqqaǵys jasady, adamdar jıi júretin oryndarǵa bılbordtar ilindi, áleýmettik jelilerge aqparattyq materıaldar salyndy.
Osy taqyryp qozǵalǵan májiliste oblys ákimi Arhımed Muhambetov Biryńǵaı jıyntyq tólem týraly turǵyndar 100 prosent aqparattanýy, onyń keıbir tustary jete túsindirilýi kerektigin aıtty. Ol basqarma mamandarynyń shalǵaı aýyldarǵa jıi shyǵýyn, adamdar arasynda bolyp, olarǵa túsindirý jumystaryn júrgizýdi tapsyrdy. Oblys ákiminiń aıtýynsha, Qostanaı oblysy boıynsha óziniń mártebesin rásimdeýden bas tartqandar sany basqa óńirlerge qaraǵanda tym kóp.
«Oblysta 18 myń adam ózin-ózi jumyspen qamtyǵany týraly mártebesin rásimdeýden bas tartyp otyr. Bul ózge óńirlerge qaraǵanda kóp. Sanynyń kóptigi jóninen respýblıkada ekinshi orynda turmyz. Batys Qazaqstan oblysynda bul kórsetkish myń adamǵa da jetpeıdi, Túrkistan oblysynda 2 mıllıon adamnyń 20 myńy bas tartqan. Al bizde 800 myń adamnyń 18 myńy óziniń mártebesin rásimdeýge qarsy. Osynyń sebebin anyqtap, olarmen túsinik jumystaryna barynsha mán berý kerek» dedi Arhımed Begejanuly.
Eske sala ketsek, ótken jyly Eńbek jáne halyqty áleýmettik qorǵaý mınıstri Mádına Ábilqasymova Biryńǵaı jıyntyq tólem engizýdi usynǵan bolatyn. Bul tórt salyq túri: jeke tabys, áleýmettik saqtandyrý qoryna, medısınalyq saqtandyrý qoryna, zeınetaqy qoryna aýdarylatyn tólemderdi bir mezgilde tóleý tetigi bolyp tabylady. Buǵan Qazaqstan turǵyndarynyń barlyǵy mindetteledi. Biraq, ózin-ózi jumyspen qamtýshylar eńbek kelisimsharty joq bolǵandyqtan, jeke kásipker retinde tirkelmegendikten halyqtyń biraz bóligi áleýmettik qamtý men saqtandyrý, zeınetaqymen qamtý júıesine enbeı qalady. Adamdardyń áleýmettik qamtýdan tys qalmaýy úshin ózin-ózi jumyspen qamtyǵandardyń mártebesin rásimdeý jáne olardyń biryńǵaı jıyntyq tólemderdi tóleýi úshin túsinik jumystary barynsha júrgiziledi.
Názıra JÁRIMBET,
«Egemen Qazaqstan»
Qostanaı
