Jaqynda jumys saparymen osy eldi mekenge jol túsip, úsh jigittiń ózge jastarǵa úlgi bolarlyq ıgilikti isin kózben kórýdiń oraıy keldi. Qyzylkesik aýylynyń ákimi Saılaý Qalıev syrty qorash ǵımaratqa qaraı jol bastaǵanda «jigitterdiń ashqan ortalyǵy rasymen osynda ma, álde basqa jerde me?» degen saýaldyń ishteı mazalaǵany ras. Osy jerde eken. Ǵımarattyń syrty kózge suryqsyzdaý kóringenimen jigitter ózderi otyrǵan bólme ishin jarqyratyp qoıypty. Sózdi «Sıfrly aýyl» jobasyn qolǵa alǵan úsh jigittiń biri О́mirjan Muqyshev bastap ketti. «Bul jobaǵa kem degende úsh adam qatysýy kerek. Áleýmettik jobanyń maqsaty - jumyssyz jastardy jumyspen qamtý. Jobanyń shartyna sáıkes alty aı tegin qyzmet kórsetemiz. Mektep pen ákimdikke aýyl turǵyndarynyń barlyǵy birdeı kire almaıdy. Olardyń ózderiniń de jumysy bar ǵoı. Biz múmkindigimizshe aýyl turǵyndarynyń barlyǵyn kirgizýge tyrysamyz» degen ol joba aıasynda 1 mıllıon teńgeniń grantyn utyp, qazir úsh jigit aı saıyn 40 pen 60 myń teńgeniń aralyǵynda stıpendııa alyp otyrǵanyn jetkizdi. Jobanyń birinshi transhyna, ıaǵnı 470 myń teńgege ınternet qostyrsa, ekinshi transhyna 2 kompıýter men prınter sekildi qurylǵylardy satyp alypty.
Internet ortalyǵynyń jumys istegenine 3 aıdan asypty. Úsh jigittiń (О́mirjan Muqyshev, Maqsat Aqanov, Maqsat Zamanbekov) sózderinen ańǵarǵanymyz, Qyzylkesik turǵyndary «Sıfrly aýyl» jobasyna dán rıza sekildi. Rıza bolmaǵanda qaıtsin, áýresi kóp qujat jumystaryn aýdan ortalyǵyna salpaqtamaı, osy jerde áp sátte bitirse. Hat deısiz be, foto deısiz be, vıdeo deısiz be, kompıýterge kiredi de, lezde jibere qoıady. «Keıde SON-nyń (halyqqa qyzmet kórsetý ortalyǵy) da mindetin atqaryp ketemiz. Elektrondy kiltteri bolsa, qalaǵan qujattaryn shyǵaryp beremiz», - deıdi isker jigitter. Isker demekshi, úsheýiniń endigi oıy – bul jobany toqtatpaı ary qaraı jalǵastyrý. «Osy jerden kishigirim ınternet klýb ashyp qoısaq pa degen oıymyz bar. О́ıtkeni, aýylda jastar kóp qoı. Qazir biz osynda jumyssyz júrgen 10 zamandasymyzdy kompıýterlik saýattylyqqa úıretip jatyrmyz. Sonymen qatar aýyldaǵy mekteptiń 8 synypta oqıtyn 12 oqýshysyna aptasyna úsh ret tegin qosymsha sabaqtar júrgizdik. Olardyń arasynda «Maıkrosoft» baǵdarlamasy boıynsha mátin terý saıysyn uıymdastyrdyq. Endi bilgenimizdi 9 synyp oqýshylaryna úıretsek pe deımiz», - deıdi Maqsat Zamanbekov.
Jigitter eldi mekendegi múmkindigi shekteýli (toptaǵy) 8 azamatqa da járdem qolyn sozyp, áleýmettik bólim qyzmetkerlerimen birlesip qujattaryn rásimdeýge, jiberýge, alýǵa kómektesip turady eken. «Bizdiń aýyl shalǵaıda oryn tepkennen keıin be, ınternet áli jetpeı jatyr. Qazir ınternetsiz jumys bitpeıtin boldy ǵoı. Myna jastar qolymyzdy uzartyp otyr. Úsheýine rahmet. Endi olar otyrǵan ǵımaratty jaqsylap jóndeýden ótkizip berse, kerim bolar edi», - deıdi О́mirjan Muqyshevtiń ákesi Serik aǵamyz. Bos turǵan burynǵy ATS ǵımaratyn úsh jigittiń paıdalanýyna berip, qamqorlyq tanytqan kezinde baılanys salasynda qyzmet istegen osy kisi eken.
Tarbaǵataı aýdandyq jastar resýrstyq ortalyǵynyń dırektory Mırat Muqyshev halyqaralyq qaıta qurý jáne damý banki men Bilim jáne ǵylym mınıstrliginiń birlesken «Zhas project» jobasyna aýdannan 12 joba usynylyp, sonyń altaýy ótip (eki jas óz erikterimen bas tartypty), qazir tórteýi júzege asyrylyp jatqanyn aıtady. Jigittermen az-kem áńgimelesip, mán-jaıdy bilgen soń olar ashqan ınternet ortalyǵynyń qýatyn, jyldamdyǵyn tekserip kóreıin dep parol surap, ǵalamtorǵa engenim sol edi, lezde jap-jasyl bolyp ýatsapqa habarlamalar túse bastady. «Kóp adam kirse, ınternettiń jyldamdyǵy azaıady. Áıtpese jaqsy ustaıdy. Aýyldyń teń jartysy parolimizdi biletin shyǵar. Syrtta otyryp-aq ınternetke kire beredi. Ásirese, jastarǵa jaqsy boldy. Qazir, keshke jaqyn qaptaıdy», - deıdi О́mirjan.
Rasynda, kún de keshkirip, aıaz da kúsheıip, jastar qaptasa qaptaıtyndaı ýaqyt bolǵan eken. Bul da durys shyǵar. Aýyl jastarynda keshke basqa qandaı jumys bar?! Al biz Aqsýatqa qaraı jol tarttyq.
Azamat QASYM,
«Egemen Qazaqstan»
Shyǵys Qazaqstan oblysy,
Tarbaǵataı aýdany,
Qyzylkesik aýyly
