Áldekim salǵan izderdi áýestemeı, shyǵarmashylyq áleminde óz tańbasyn syzýǵa talpynǵan talant ıesiniń aıryqsha týyndylaryna qyzyǵýshylyq zor. Sýretshiniń Á. Qasteev atyndaǵy О́ner mýzeıinde ashylǵan «Qum jazýy» dep atalǵan jeke kórmesi tylsym ónerdiń tuńǵıyǵyna boılatatyndaı.
Ekspozısııada avtordyń grafıka jáne keskindemelik mánerde oryndaǵan júzden asa shyǵarmasy usynylǵan. Qylqalam sheberiniń «Jyrshy», «Maıqańbaq», «Saǵym», «Qorqyt pen Asan», «Kóktebe etıýdteri», «Kúz túni», «Áje», «Batyrlyq dastan», «Jýsaǵan jylqylar», «Qaıran Naryn», «Beý, Balalyq» syndy otty týyndylary ulttyq naqyshpen, týǵan jerge degen ystyq sezimmen, názik te asqaq sheshimdermen órilgen. О́nertanýshy Sáýle Bekqulova bul týraly: «Tabyldynyń taqyryptarynyń kókjıegi keń, búkil adamı asyl qasıetterdi altyn ózegine aınaldyrǵandaı aıdyndy, aıbyndy bola tura, osy ıdeıalardyń barlyǵyn ol týǵan jer arqyly, týǵan topyraǵy arqyly kóteredi» depti. Shynynda da, óziniń búkil arman-ańsaryn tańǵan týǵan jer sýretshiniń ónerine dem berip, ómirine ózek bolyp, shyǵarmashylyq órisin keńeıtkeni anyq. Ol keıiptegen keskinderge kóz sýarǵan kez-kelgen kórermen muny birden ańǵarady.
– «Qum jazýy» kórmesinde usynylǵan ulttyq erekshelikter men ishki rýhanı qundylyqtardy kórsetetin týyndylar kórermenge ótken ýaqytpen ózara suhbatqa túsýge múmkindik beredi. Sýretshi óz jeriniń, onyń tabıǵaty, tarıhy men dástúrleriniń jyrlaýshysy. Ol óz halqynyń jan dúnıesin názik sezine biledi. Onyń basty maqsaty – týǵan eliniń kúndelikti ómirindegi sulýlyq, onyń darhan dalasy men tabıǵatyna, adamdaryna degen súıispenshiligin bildirý. Bala kezinde ol ákesimen birge jaılaýǵa baryp, dala ómiriniń ár túrli daýysyn baqylaıdy – sol balalyq áserler onyń jan dúnıesine tereń áser qaldyryp týǵan jer taqyrybyna degen qumarlyǵyn oıatqan, – deıdi kórme jetekshisi Anjelıka Aqylbekova.
Tabyldy Muqatov kópshilik qaýymǵa kitap ıllıýstratory retinde de jaqsy tanys. Ol bezendirgen eńbekter qazaq aqyn-jazýshylarynyń shyǵarmalaryndaǵy birqatar ulttyq beınelerdi jasaýǵa septigin tıgizdi. Onyń grafıkasyna kompozısııanyń qarapaıymdylyǵy men aıqyndylyǵy, yqshamdylyq, tazalyq, ashyq tús, sulbalardyń naqtylyǵy tán. Kórermendi yntyqtyrǵan kórme aqpan aıyna deıin jalǵasyn tabady.
Arman OKTIаBR,
«Egemen Qazaqstan»
ALMATY
