Winter CAMP - qystyq oqý-jattyǵý lageri bıyl qatarynan besinshi ret uıymdastyrylyp otyr. Is-sharaǵa respýblıka mektepterinen eń úzdik atanǵan bitirýshi túlekter iriktelip alynǵan.
Bes kúndik baǵdarlama aıasynda qatysýshylarǵa elimizdiń bilikti mamandary men ustazdary dáris oqydy. Sonymen qatar Súleıman Demırel ýnıversıtetiniń rektory Qanat Qojahmet jáne beldi joǵary oqý oryndarynyń rektorlarymen qatar belgili qoǵam qaıratkerleri de jasóspirimderge paıdaly semınarlar ótkizdi. Oqý baǵdarlamasynyń jospary barysynda bitirýshi túlekterdi mamandyq tańdaýǵa baǵyttaıtyn elimizdiń bedeldi on ýnıversıtetiniń qatysýymen arnaıy bilim kórmesi ótti.
«Qysqy lagerdiń basty maqsaty – talapkerlerge Ulttyq biryńǵaı testileý kezeńiniń aldynda jańa baǵyt-baǵdar men serpilis berý. Oqý baǵdarlamasy jan-jaqty qyzyqty ótý úshin qatysýshylarǵa túrli sporttyq oıyndar men zamanaýı kvest oıyndary ótkizildi» deıdi uıymdastyrýshylar.
Shara sońynda úzdik atanǵan toptar arnaıy alǵys hattar jáne baǵaly syılyqtarmen marapattaldy.
Eske sala ketsek, osy jyldan bastap joǵary oqý ornyna aqyly negizde túsý úshin UBT jylyna 4 ret, ıaǵnı qańtar, naýryz, maýsym-shilde, tamyz aılarynda ótkiziledi. Bul týraly QR Bilim jáne ǵylym vıse-mınıstri Ashat Aımaǵambetov málimdegen bolatyn. Sondyqtan mundaı alańdar men daıyndyq ortalyqtary balalarǵa erekshe serpin beredi. Mamandardyń sózinshe, ótken jyly UBT-dan joǵary upaıǵa ıe bolǵan Shıara Qudaıbergenova (2018, 140 upaı) óz bilimin osyndaı daıyndyq ortalyqtarynda shyńdaǵan.
Arman OKTIаBR,
«Egemen Qazaqstan»
ALMATY
