Ishki ister mınıstriniń birinshi orynbasary Janat Súleımenov Ortalyq kommýnıkasııalar qyzmetinde ótken brıfıngte osy derekterdi keltire otyryp, bıyl polısııaǵa qatysty júzege asyrylatyn jańashyldyqtardy tanystyrdy. Onyń aıtýynsha, birinshi kezekte ishki ister organdarynyń uıymdastyrý-shtattyq qurylymyn jańǵyrtý máselesi tur. Naqtyraq aıtqanda, bıyl polısııanyń basqarýshy laýazymdaryn 10 paıyzǵa nemese 450 birlikke azaıtý kózdelgen.
– Qyzmetkerlerdi áleýmettik qoldaý, jalaqysyn kóterý máselesi de negizgi mindetterdiń biri. Jalaqy kóterý qyzmetkerlerdi qysqartý arqyly únemdelgen 16 mlrd teńge jáne qosymsha bólinetin qarajat esebinen júzege asyrylady. Onyń ishinde patrýldik polısııa qyzmetkerleriniń jalaqysy – 65 paıyzǵa, shuǵyl áreket etý-tergeý qurylymdary qyzmetkerleriniń jalaqysy – 55 paıyzǵa, ýchaskelik ınspektorlardyń jalaqysy – 25 paıyzǵa jáne basqa qyzmetkerlerdiń eńbekaqylary 20 paıyzǵa kóbeıtiledi, – dedi Ishki ister mınıstriniń birinshi orynbasary.
Sonymen qatar bıyldan bastap vedomstvolyq oqý oryndaryn ońtaılandyryp, qazirgi 12 oqý ornynyń tek beseýi ǵana qaldyrylady. Osy aıdyń sońyna taıaý polısııa qataryna joǵary zańgerlik bilimi bar 1200 qyzmetkerdi jumysqa qabyldaý sharalary bastalmaq. Olar aldymen 3 aılyq daıarlyqtan ótkiziledi.
Janat Súleımenovtyń aıtýyna qaraǵanda, joǵaryda atalǵan Jol kartasyna baılanysty ishki ister salasy keıbir fýnksııalardan azat etilmek. Onyń aıasynda kúzet qyzmetin basqa memlekettik organdarǵa nemese básekelestik ortaǵa berýge daıyndyq bastalǵan. Bul shara saptaǵy polıseıler sanyn qysqartýǵa jol ashady. Dálirek aıtqanda, qazir polıseıler kúzetýge mindettelgen 748 nysandy kúzetýden bosatylyp, 4,5 myń qyzmetker qysqartylyp, 5,5 mlrd teńge únemdelmek.
Ishki ister mınıstriniń birinshi orynbasary Memleket basshysynyń tapsyrmasyna saı aýdandyq jáne qalalyq, oblystyq polısııa ǵımarattarynda halyqtyń aryz-shaǵym qabyldaýǵa arnalǵan front-keńselerdiń ashylyp jatqandyǵynan da habardar etti. Bul baǵyttaǵy jumystar jyldyń alǵashqy jartysynda tolyq júzege asyrylmaqshy.
Sondaı-aq qazir polısııa qyzmetkerlerin kezekten tys attestasııadan ótkizýdiń qamy jasalýda.
J.Súleımenov atalǵan reformanyń qylmystyq atqarý júıesi men tótenshe jaǵdaılar salasyn da qamtıtyndyǵyn atap ótti.
Jalpy, 2018 jyldyń qorytyndysyn da jarııa etken Ishki ister mınıstriniń birinshi orynbasary byltyr elimizde qylmys deńgeıiniń azaıǵandyǵyn da atap ótti. Onyń ishinde aýyr qylmys 22 paıyzǵa jáne asa aýyr qylmys 12 paıyzǵa tómendegen. Al ortasha dárejeli qylmys – 66 paıyzǵa, asa aýyr emes qylmystar 10 paıyzǵa azaıǵan.
J. Súleımenov tonaý qylmysy – 14 paıyzǵa, buzaqylyq – 23 paıyzǵa, urlyq – 6 paıyzǵa, sondaı-aq qaraqshylyq shabýyl 15 paıyzǵa tómendegen aıtty.
Serik ÁBDIBEK,
«Egemen Qazaqstan»
