Sýrette: baıqaý jeńimpazy Iýrıı TKAChEVSKII
Oǵan Qazaqstan Respýblıkasy Bilim jáne ǵylym mınıstrliginiń Ǵylym komıteti, A.Baıtursynov atyndaǵy Til bilimi ınstıtýty qoldaý kórsetti. Bul qanatqaqty jobaǵa qandastarymyz Reseıdiń Orynbor, Saratov, Omby, Astrahan, Altaı, Máskeý, Ekaterınbýrg, Chelıabi, Iаroslavl sekildi ár shalǵaıynan qatysyp, Abaı óleńderin oqydy. Baıqaýdyń sharty boıynsha, olar Abaı óleńderin beınetaspaǵa jazyp, kópshilikke usynyp otyrdy.
– Bul baıqaýǵa qatysqan ár qazaqty «Abaıdy oqymaı qazaqpyn deme...» degen namys jeteledi. Mundaı jarys Reseı qazaqtary arasynda buryn-sońdy bolǵan emes. Onyń eki ereksheligin atap aıtqym keledi. Aldymen, biz burynǵydaı qarjy, ýaqyt shyǵyndap, bir qalaǵa jınalǵan joqpyz, órkenıettiń jetistigin paıdalandyq. Keń baıtaq Reseıdiń túkpir-túkpirinde turyp jatqan aǵaıyndar Abaıdyń óleńderin beınetaspaǵa jazyp, jiberdi. Ony reseılik jáne odan tys jerdegi qazaqtar ınternet arqyly kórip otyrdy. Ekinshiden, qandastarymyz kóptep shoǵyrlanǵan Orynbor, Saratov, Omby sekildi oblystardan qazaqtar belsene qatysty, árkim ár jaqqa tartpaı, aýyzbirshilik tanytty. Jastardyń, balalardyń kóp qatysýy kóńildi demdedi. Qazylar alqasy da qorytyndy shyǵararda telefon baılanysy arqyly kópshiliktiń pikirin bilip, olardy eskere otyryp, jeńimpazdy anyqtady, – deıdi Sáýle Sovhozqyzy.
Iаroslavl oblysyndaǵy Poshehone selosyna Qazaqstannan qonys aýdarǵan Iýrıı Tkachevskıı degen jigit Abaı óleńin oqyǵanda uly aqynnyń qandastarynan asyp tústi. «Bala kezimde Abaıdyń óleńderin atam erekshe unatatyn edi. Men uıqyǵa jatarda Abaı óleńderimen kóz iletin edim», dep ol aqynnyń óleńderin múltiksiz oqı jóneldi. Baıqaý qorytyndysynda Máskeý qalasynda turatyn aqyn Jarqyn О́tesheva bas bolǵan qazylar alqasy Iýrııdi úzdik dep tanydy.
– Reseı qazaqtary úshin bul óner jarysynyń mańyzy erekshe boldy. Bul bárimizdiń jeńisimiz! Osylaı, bir kisiniń balasyndaı ár isti birge tyndyrsaq, biz almaıtyn qamal joq. Baýyrlarym, biz myqtymyz! Biz ana tilimizdi súıemiz! Osylaı alǵa umtyla bereıik! Abaıdyń tiline qurmet kórsetken, Abaı óleńderin súıip oqyǵan Iýrıı, sen de qazaǵymnyń birisiń, baýyrymsyń! – dep aqyn aǵaıynǵa aqjarma qýanyshyn jazyp jatty.
Orynbor oblysy qazaqtarynyń kóshbasshysy Sáýle Táıkeshevanyń aıtýynsha, aldaǵy ýaqytta bul joba jalǵasyn tabatyn bolady. Endigi kezek «Batyrlar jyry» epostaryna beriledi. Halqymyzdyń aýyz ádebıeti marjandarynan úzindi jattap, ony beınetaspaǵa jazý, ony kórermenge usyný bir aı boıy júredi.
Názıra JÁRIMBET,
«Egemen Qazaqstan»
QOSTANAI
