«Qulqynnyń quly» – sybaılas jemqorlyq jaılaǵan ortanyń shyndyǵyn ashqan shyǵarma eken. Avtor pesanyń negizgi kilti retinde aýyldaǵy áleýmettik jaǵdaı men jeń ushynan jalǵasqan jemqorlardyń is-áreketin sheneıdi. Bul shyǵarmanyń taǵy bir ereksheligi bar. Osy kezeńge deıin sahnalyq qoıylymdarda jergilikti bılik ókiliniń jaǵymsyz beınesin kórsetetin obraz joqqa tán edi. Mysalǵa, aýyl ákiminiń jer satyp, para alyp, odan qaldy qorǵansyz qyzdy qorlaýy jaıly ashy sıýjet ádebı jazbalarda kezdespegeni anyq. Bul turǵyda Turlybek Mámeseıittiń dramasy zaman adamynyń beınesin ashyp, qoǵamnyń keselin dóp basyp kórsete alýymen qundy.
...Aýyl ákimi Qaıyrbek sybaılas deldaldyń dem berýimen memleket menshiginde alqaptardy bólip, qymbat baǵaǵa jer satýdy ádetke aınaldyrady. Ońaı olja men qampaıǵan qaltanyń býy ákim úshin týǵan jer, adam qundylyǵy sııaqty qasıetti shekteýlerdiń túkke turmaıtynyn, ómir tek baılyq pen bılikke ǵana negizdelgenin uqtyrǵandaı. Tıynnan tıyn saýyp, ebin tapsa adamnyń ar-uıatyn satyp alýǵa bolatynyn isimen dáleldep júrgen Ahmettiń aldynan únemi qaraý nıetti ákim, paıda izdegen kásipker, aqshaǵa qunyqqan sheneýnik shyǵyp otyrady. Ol osy jolda Astanadan arnaıy kelgen qaltaly adamǵa aýyldyń qarapaıym qyzy, sulý da aqyldy Mádınanyń aryn aıaqqa taptatyp, qorlyqqa berýden de taıynbaıdy...
Dramanyń sharyqtaý shegindegi oqıǵalar osylaı órbip kelip, ádilet sotynyń úkimi shyqqansha tutas bir urpaqtyń taǵdyry talqan bolyp, kezdeısoq adamdardyń qurbandyqqa shalynyp ketýinen saqtandyrýǵa tyrysady. Jalpy, dramanyń ómirsheńdigi osyndaı táýekeldi sheshimmen aıaqtalýy bolsa kerek. Osylaısha, rejısser, Halyq ártisi Ersaıyn Tóleýbaı sahnalaǵan «Qulqynnyń quly» taldyqorǵandyq kórermenniń kóńil tórinen oryn alǵany anyq.
Qalmahanbet MUQAMETQALI,
«Egemen Qazaqstan»
Almaty oblysy
