PIK-ter joıylady
2019 jyly páter ıeleri úshin basty ózgeristiń biri úıdi basqarý formasynyń ózgerýi. Ádettegi PIK-ter (páter ıeleri kooperatıvi) budan bylaı menshik ıeleri birlestigi (MIB) bolyp ózgeredi. Iаǵnı, «Turǵynúı-kommýnaldy sharýashylyǵy máselesi boıynsha QR keıbir zańnamalyq aktilerine ózgerister men tolyqtyrýlar engizý týraly» zań jobasyn qarastyrý boıynsha jumys toby depýtattarynyń kópshilik daýysymen «bir úı – bir birlestik – bir esepshot» qaǵıdasy boıynsha MIB quryldy. Turǵyn úı-kommýnaldyq sharýashylyq salasyndaǵy ózge reformalarǵa keler bolsaq, joǵarydaǵy zań jobasy qabyldanǵannan turǵyn úı qatynastaryna qatysýdyń ashyqtyǵyn qamtamasyz etetin turǵyn úı qory men TKSh-nyń biryńǵaı aqparattyq júıesi jasalady. Kapıtaldy jóndeýge aqsha jınaý qory qurylyp, qarjy pıramıdasyn qurýdyń aldyn alý maqsatynda turǵyn úı kooperatıvteri joıylady.
Kommýnaldyq qyzmet arzandaıdy
2019 jyldyń 1 qańtarynan bastap elektr jáne jylý energetıkasy, sý jáne gazben qamtý, káriz, telefon baılanysy men ınternet qyzmetteriniń tarıfteri arzandaıdy. Sonymen qatar úkimet PIK tarıfterin de qaıta qaraýdy tapsyrdy. Bul jergilikti ákimdikterdiń quziretine kiredi. Úkimet basshysy Baqytjan Saǵyntaevtyń aıtýynsha, tarıfterdiń arzandaýy qyzmet sapasyna keri áserin tıgizbeýi kerek jáne TKSh nysandaryna jańǵyrtý jumystary júrgizilýge tıis. Jalpy, monopolıster elektr men jylý energetıkasyna, sýmen qamtýdyń tarıfterin jalpy kólemi 20,3 mlrd teńgege arzandatady.
Keıin satyp alynatyn jaldamaly úı salynbaıdy
2019 jyldan bastap keıinen satyp alynatyn jaldamaly úıler salynbaıdy. Bul sanat negizingen ákimdikte kezekte turǵandarǵa arnalǵan edi. Úkimettiń málimetinshe, bul sanat jalpy qarjylandyrý tetikteriniń tıimsizdigin kórsetti. Jalpy, aldaǵy 15 jylda Qazaqstanda «Nurly jer» boıynsha 1,5 mln otbasyn úımen qamtý josparlanyp otyr.
Kezektegilerdiń sanattary qysqartylady
Úkimet baspana alýǵa kezekte turǵandardyń sanattaryn qysqartý arqyly memlekettik qordan úı alýdyń tártibin ońtaılandyrmaqshy. Bul «Turǵyn úı qatynastary men rennovasııa máselesi jáne Qazaqstan Respýblıkasy astanasy – Astana qalasyn ary qaraı damytý boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasynyń tujyrymdamalaryn talqylaý kezinde usynyldy. Qujatty daıyndaýshylar jergilikti atqarýshy organdar arqyly turǵyn úı kezegindegi qazirgi 19 sanattyń ornyna áleýmettik az qamsyzdandyrylǵan azamattardy 8 topqa ǵana bólýdi usyndy.
Atap aıtar bolsaq, olar:
1) UOS ardagerleri men múgedekteri;
2) jetim balalar men ata-ana qamqorlyǵynsyz qalǵan balalar;
3) UOS ardagerleri men múgedekterine teńestirilgen azamattar;
4) 1-, 2-shi top múgedekteri;
5) múgedek balasy bar nemese múgedek bala asyrap otyrǵan otbasylar;
6) QR Úkimeti bekitken syrqattar tiziminde bar sozylmaly aýyr aýrýmen aýyratyn azamattar;
7) kópbalaly otbasylar;
8) memlekettik nemese qoǵamdyq mindetterin, áskerı qyzmetterin oryndap júrip, ǵarysh keńistigine ushý kezinde nemese ushýǵa daıyndyq barysynda, adam ómirin qutqarý kezinde, qoǵamdyq tártipti saqtaý kezinde qaıtys bolǵan azamattardyń otbasy.
