Búgin óńir basshysynyń tóraǵalyǵymen ótken otyrysta merekelik sharalardyń aldyn ala jospary qaraldy, solardyń ishinde álemge tanymal aqtóbelik Dımash Qudaıbergenniń de konserti bar.
Sonymen birge oblys ákimi bıyl jyl boıy halyqaralyq, respýblıkalyq, óńirlik jáne oblystyq deńgeıdegi kóptegen is-shara ótetinin jáne uıymdastyrýshylar kóńil kóteretin baǵdarlamalarmen shektelmeıtinin atap ótti.
«Bastysy – bul keıin qala turǵyndary men qonaqtaryna osy kúndi eske salatyn, oblys ortalyǵynyń ári qaraı damýyna qyzmet etetin jańa áleýmettik jáne óndiristik nysandardyń ashylýy. Eshbir aqtóbelik bul úlken is-sharadan tys qalmaýy tıis»,- dedi Berdibek Saparbaev.
Búginde sharalar josparyna 3 600 jańa jumys ornyn qura otyra, kem degende jıyrma ónerkásip nysanyn, alty kókónis qoımasy men jylyjaı, 28 qyzmet kórsetý salasynyń nysandaryn ashý kirdi. 3100-den asa páter, jańa mektepter men balabaqshalar, saıabaqtar men gúl baqtary paıdalanýǵa beriledi.
Sondaı-aq, Aqtóbede Bókenbaı batyrǵa, Eset batyr men Aqtóbe keńesiniń birinshi tóraǵasy Vasılıı Zınchenkoǵa eskertkishter ashylady. Aqtóbeniń 150 jyldyǵyna arnap monýment, jıyrma kishigirim sáýlettik pishin turǵyzý, mereke emblemasy – logotıpti ázirleý, qalanyń tarıhy men damýy jaıly derekti fılm túsirý jumystary bastalyp ketti. Sol kúni qaıyrymdylyq sharalaryna da erekshe nazar aýdarylatyn bolady.
Aıta keteıik, óńirdiń 12 aýdany oblys ortalyǵynyń mereıtoıyna arnaǵan syılyǵy retinde jańa áleýmettik nysandardy salýǵa jáne abattandyrýǵa nıetti.
Bul - Aqtóbeniń 150 jyldyǵyna oraı ótkiziletin is-sharalardyń kishkene bóligi ǵana.
