Elorda bıligi Astananyń iskerlik týrızm jáne ınnovasııalar ortalyǵy retindegi mártebesin nyǵaıtý baǵytyndaǵy sharalardy júzege asyrýdy jalǵastyrýda. Qala aktıvimen kezdesý barysynda Astana ákimi Baqyt Sultanov bıyl elordada qalalyq týrızm boıynsha Dúnıejúzilik UNWTO sammıti ótetinin aıtty.
Esterińizge sala keteıik, segizinshi márte ótkizilgeli otyrǵan sammıt Ortalyq Azııada tuńǵysh ret uıymdastyrylmaq. Jıynnyń Qazaqstannyń bas qalasynda ótetini Ońtústik Koreıanyń astanasynda uıymdastyrylǵan 7-shi jahandyq UNWTO sammıti kezinde belgili boldy.
Sonymen qatar, Routes Silk Road avıamarshrýttar forýmy, Comic Con kostıýmder festıvalin ótkizýmen qatar, Jeneva qalasynda ornalasqan Halyqaralyq Seedstars bıznes-akseleratorymen birlesip, «Astana» halyqaralyq qarjy ortalyǵy aýmaǵynda qalalyq ınnovasııalyq alańdy ashý kózdelip otyr. Bul TMD-da Seedstars basqaratyn alǵashqy kovorkıng-ortalyq bolady, onyń jelisine 70 myńnan astam startapshy, kásipkerler men ınvestorlar enedi.
