«О́kinishke qaraı, bizde et, qýyrdaq pen baýyrsaqtan basqa ulttyq taǵam joq sekildi kózqaras qalyptasqan. Týrısterge kóbine osy taǵamdardy usynamyz. Búginde elimizde qazaqtyń ejelgi dastarhanyn qaıta jańǵyrtý jumystary júrgizilip jatyr. Qýantarlyq, quptarlyq dúnıe. Meniń bilýimshe, Shyǵys Qazaqstanda, О́skemende bul jumyspen shuǵyldanyp jatqan eshkim joq. Sondyqtan osy isti qolǵa alýdy jón dep sheship, alty taǵam túrin ázirledik. Bizdiń maqsat – ózbek ashanasy, uıǵyr ashanasy degen sekildi «Altaı dastarhany» brendin qalyptastyrý, umytyla bastaǵan ulttyq taǵamdardy zamanǵa saı jańǵyrtý. Eń mańyzdysy, ulttyq taǵamdarymyzdy shet eldik týrısterge tanystyrý», - deıdi óskemendik kásipker Muhtar Toıbazarov.
Kásipker daıyndaǵan alty as máziriniń úsheýi - Jaýjúrek, Úlpershek, Mı palaý atalatyn qazaqtyń ejelgi taǵamdary. Qalǵan úsh taǵam eýropalyq úlgide ázirlenipti. Máselen, tartylǵan jylqy etinen daıyndalǵan Tar-tar atalatyn taǵamǵa kádimgi ezilgen qurt pen qyzyl sarymsaq pen cheremsha, ystalǵan quıryqqa sarymsaq pen qyzyl jıdektiń qaınatpasy, jylqy etine shyrǵanaq qosylypty. «Altaıda ósetin shópterdi de paıdalandyq. Mı palaýǵa úı qaımaǵyn qostyq, qazydan pashtet jasap, qoıdyń júregine saldyq. Úlpershekti osyndaı ádispen daıyndadyq. Ár aımaqtyń taǵam daıyndaý ereksheligi bar. Máselen, Semeı jaqtyń qurty ózgeshe daıyndalady. Úrjardyń qyzyl irimshigi qandaı! О́ńirimizde turyp jatqan dıasporalardyń da ózindik as máziri qalyptasqan. Biz sonyń bárin qarastyryp, «Altaı dastarhany» brendin qalyptastyryp, Shyǵys Qazaqstannyń ereksheligin kórsetkimiz keledi», - deıdi kásipker.
Azamat QASYM,
«Egemen Qazaqstan»
О́SKEMEN
