Osy mektep dırektorynyń oqý-tárbıe isi jónindegi orynbasary, ádisker ustaz, bıologııa pániniń oqytýshysy Gúlzıra Baıdildaeva ata-ana tarapynan jábirlenip, aýyr dene jaraqatyn alǵan bolatyn. Biz bul jaıly «Egemen Qazaqstan» gazetine «Ustazǵa nege qol jumsaıdy?» degen taqyryppen maqala jarııalaǵanbyz (qarańyz: https://egemen.kz/article/164155-ustazgha-nege-qol-zhumsaydy). Oqıǵanyń budan keıingi órbý barysy redaksııa nazarynda bolyp, jábirlenýshiniń talap aryzy boıynsha qozǵalǵan tergeý isi men sot otyrysyn únemi baqylaýda ustap keldik. Biraq, jylǵa jýyq ýaqyt ótse de qylmystyq is áli kúnge deıin sozylyp, Ile aýdandyq sotynda qaralyp jatyr.
«Egemen Qazaqstannyń» menshikti tilshisine habarlasqan jábirlenýshiniń qorǵaýshysy Marjan Aspandııarova tergeý isiniń 11 aıǵa sozylǵanyna qaramastan, sot osy qylmystyq iske sońǵy núkte qoıýǵa asyqpaı otyrǵanyn aıtty. Osy merzim ishinde aıyptalýshy jaqtyń sot otyrysyna sebepsiz kelmeı qalý faktisi bolǵanyn jáne tergeý barysyna kóńili tolmaıtynyn da jetkizdi qorǵaýshy. Biz 9 qańtar kúnine belgilengen sot otyrysyna qatysyp, istiń mán-jaıymen tanystyq.
Jalpy, bul is Almaty oblysynyń Ile aýdandyq sotyna kelip túskenge deıin aýdandyq ishki ister bóliminde 11 aı boıy tergelgen eken. Jábirlenýshiniń advokaty tergeýshi isti sebepsiz sozyp, oqıǵanyń beınetaspaǵa jazylǵan sátin esepke almaýǵa tyrysqanyn jáne kýágerlerdiń túsiniktemesine nemquraıly qaraǵandyǵyn aıtady. Tek oblys prokýroryna birneshe ret shaǵymdanǵannan keıin ǵana, tergeý aıaqtalypty. Al ótken jyldyń 20 jeltoqsany kúnine taǵaıyndalǵan aldyn-ala sot tyńdaýyna aıyptalýshy tarap kelmeı qoıǵan. Isti qaraý keıingi shegerilgen. Qylmystyq is boıynsha kúdikti dep tanylǵan ata-ana budan keıin ótken 2 sot otyrysyna da qatyspaǵan kórinedi. Sonyń saldarynan sot qaıta-qaıta keıinge jyljyp keledi.
Biz jábirlengen ustaz isine memlekettik aıyptaýshy retinde qatysyp otyrǵan prokýrordan tergeý men sot barysyndaǵy zańdylyq saqtalýy jaıynda suraǵan edik.
- Azamatsha Gúlzıra Baıdildaevanyń talaby boıynsha qylmystyq isti qaraý birneshe ret keıinge qaldyrylǵany ras. Bul jerde aıyp taǵylyp otyrǵan taraptyń densaýlyǵyna baılanysty anyqtamasy bolǵandyqtan is shegerildi. Qazir sot jábirlenýshi tarap pen kýágerlerden jaýap alýdy bastady. Is azamatsha Mıtroshenko Nadejda Pavlovnaǵa qatysty «Qylmystyq kodekstiń» 107-baby, 1-tarmaǵymen «qasaqana dene jaraqatyn salý» boıynsha qaralyp jatyr, - dedi Ile aýdandyq prokýratýrasynyń aǵa prokýrory Muhtar Myńjasar.
Al sottyń 9 qańtar kúngi otyrysy qorǵaýshynyń qosymsha kýálardan jaýap alýdy suraǵan ótinishine oraı 15 qańtarǵa shegerildi.
Jalpy, Gúlzıra Baıdildaevanyń talap aryzy negizinde qozǵalǵan qylmystyq is – elimizdiń sot jáne bilim salasy tarıhynda ata-ana tarapynan jábir kórgen muǵalimniń sotqa júginý boıynsha alǵashqy is. Jábirlenýshi ustaz istiń tezirek aıaqtalyp, ádilet saltanat quratynyna senimdi.
- Aýyr soqqydan keıin uzaq emdeldim. Densaýlyǵyma kelgen nuqsan áli ońalmady. Qulaqtyń estý júıesinde soqqydan keıin bolǵan kemistiktiń emi joq dedi dáriger. Ári men osy oqıǵadan keıin ol mektepten ketip, basqa jerge jumys aýystyrýyma týra keldi. Jáne 1 jyl boıyna oqýshynyń ata-anasy tarapynan tatýlasý, keshirim suraý nıeti bolǵan joq. Kerisinshe, sot otyrysynan keıin dóreki sóılep, doq kórsetip ketti...- deıdi ustaz.
Árıne, uzaq ýaqyt boıy qoǵamdyq talqylaýǵa ulasqan bul oqıǵanyń sońǵy núktesin endi sot qoıady. Biz óz tarapymyzdan is barysy «Egemen Qazaqstannyń» nazarynda bolatynyn eskertemiz.
Qalmahanbet MUQAMETQALI,
«Egemen Qazaqstan»
Almaty oblysy,
Ile aýdany
Sýret «Almaty» arnasynan alyndy
