Nátıjesinde 197 573 otbasy baspanamen qamtamasyz etilip, onyń ishinde 2017 jyly – 11 168 myń sharshy metrdi quraıtyn 100 812 baspana, 2018 jyldyń 11 aıynda – 10 993 myń sharshy metrdi quraıtyn 96 761 baspana paıdalanýǵa berilipti.
El Úkimetiniń málimetterine qaraǵanda, «Nurly jer» turǵyn úı baǵdarlamasy 15 jylda 1,5 mln otbasyn turǵyn úımen qamtamasyz etýge baǵyttalǵan. Baǵdarlama júzege asyrylǵan 2 jyldyń ishinde shamamen 200 myńǵa jýyq otbasy turmys jaǵdaıyn jaqsartýǵa múmkindik aldy. Búginge deıin atalǵan memlekettik baǵdarlama boıynsha Astana qalasynda 4,7 mln, Almaty qalasynda 2,6 mln, Mańǵystaý oblysynda 1,8 mln, Aqtóbede 1,5 mln, Atyraýda 1,3 mln, Almaty oblysynda 1,3 mln jáne Qyzylorda oblysynda 1,2 mln sharshy metr baspana salynǵan.
Elimizdegi turǵyn úı salasynda buǵan deıin bolǵan barlyq mehanızmder «Nurly jer» baǵdarlamasynda tolyqtaı qarastyrylyp otyr. Turǵyn úıge qarjy jınaý, ıpoteka resimdeýden bólek, jeke turǵyn úı salý máselesi atalǵan baǵdarlamada jan-jaqty qamtylyp, naryqqa barynsha beıimdelý kózdelgen. Sonyń nátıjesinde «Nurly jer» baǵdarlamasy aıasynda «Damý» AQ-nyń memlekettik sýbsıdııalary arqyly banktik nesıelerdiń qunyn tómendetý boıynsha jumystar atqarylýda. Búginde qatysýshy bankterge jeke qurylys salýshylardan 72,6 mlrd teńgege 84 ótinim túsip, onyń ishinde «Damý» AQ arqyly 45,2 mlrd teńgege sýbsıdııalanǵan nesıelerdi berý týraly 51 kelisimge qol qoıyldy. 2020 jylǵa deıin barlyǵy 152 mlrd teńgege sýbsıdııalanǵan nesıe berilip, 600 myń sharshy metrlik kommersııalyq turǵyn úı salý josparlanyp otyr. Onyń 199,6 myń sharshy metri qazir daıyn.
Aıta keterligi, «Nurly jer» memlekettik baǵdarlamasy iske asyrylǵannan beri 876,9 myń sharshy metr nesıelik turǵyn úı nemese 14658 páter salyndy (2017 jyly – 570,4 myń sharshy metr nemese 9010 páter, 2018 jyldyń 11 aıynda – 306,5 myń sharshy metr nemese 5648 páter).
Memlekettik baǵdarlamany iske asyrý barysynda qazaqstandyqtardyń jeke turǵyn úı qurylysyna qyzyǵýshylyǵy artqan. Ákimdikterde jer telimin alýǵa kezekte turǵandar qanatqaqty jobaǵa qatysýǵa jáne ınjenerlik kommýnıkasııalyq ınfraqurylymy júrgizilgen daıyn úıdi jer telimimen satyp alýǵa, sonymen qatar Turǵyn úı qurylys jınaq bankinen jeńildetilgen nesıe alýǵa múmkindik aldy. Osyndaı tásilder arqyly kezekte turǵandar úshin aı saıynǵy tólem alǵashqy 5 jylda – 70 myń teńge, keıingi 10 jylda – 56 myń teńge bolady. Bul sharalar jyl saıyn shamamen 40 myń úı (4 mln m²) salýǵa jol ashady. Máselen, 2017 jyly 184 úı paıdalanýǵa berilgen.
Erkejan AITQAZY,
«Egemen Qazaqstan»
