Sheberhanaǵa arnaıy kelgen «Nur Otan» partııasy Tóraǵasynyń Birinshi orynbasary nysannyń jumysymen tanysyp, mekeme ujymymen kezdesti. О́z sózinde partııa Tóraǵasynyń Birinshi orynbasary áleýmettik bastamalardyń mańyzy men olardyń el damýyna tıgizer áseri jóninde aıtty.
– Elbasy Qazaqstan halqyna arnaǵan Joldaýynda múmkindigi shekteýli jandarǵa júıeli qoldaý kórsetý jáne olar úshin kedergisiz orta qalyptastyrý týraly aldymyzǵa naqty mindetter qoıdy. Soǵan baılanysty partııamyz belsendi áreket etip, naqty jumystardy qolǵa aldy. «Kedergisiz keleshek» partııalyq jobasy aıasynda da birneshe baǵytta aýqymdy jumystar atqarylyp jatyr. Atap aıtqanda, ınklıýzıvti bilim berý isine, kedergisiz orta qalyptastyrýǵa, múmkindigi shekteýli jandardyń saıası-áleýmettik ómirge belsene qatysýyn qamtamasyz etýge jáne olardy jumyspen qamtýǵa basymdyq berip otyrmyz, – dedi Máýlen Áshimbaev.
Qazirgi tańda múmkindigi shekteýli jandardy jumyspen qamtý qoǵamymyzdaǵy eń ózekti máselelerdiń biri ekeni sózsiz. О́ıtkeni, ókinishke qaraı, mundaı azamattardy barlyq kásiporyn birdeı jumysqa qabyldaı bermeıdi. Sol sebepti, «Nur Otan» partııasy osy máseleni tıimdi sheshýdiń ozyq úlgilerin qarastyryp, utymdy joldaryn qolǵa almaq.
– Árıne, múmkindigi shekteýli azamattar memleketten tıisti járdemaqy alady. Degenmen, olardyń arasynda jumysqa qabiletti jáne eńbekke aralasqysy keletinderi bar. Sondyqtan olardyń qosymsha tabys taýyp, ómir súrý sapasyn arttyrýyna laıyqty jaǵdaı jasalýy tıis, – degen Máýlen Áshimbaev osy iste áleýmettik kásipkerliktiń bereri mol ekenin aıtty.
Sonymen qatar ol «Nur Otan» partııasynyń elimizde atalǵan kásipkerlikti damytýǵa yqpal etýdi josparlap otyrǵanyn jetkizdi. Bul iste «GreenTAL» sııaqty kompanııalardyń tájirıbelerine erekshe nazar aýdaryp, ony Qazaqstannyń ózge óńirlerinde de iske asyrýǵa jaǵdaı jasalýy tıis.
Áleýmettik mekemeniń jumysymen tanysý barysynda Máýlen Áshimbaev áli de jetildirýdi qajet etetin tustarǵa da nazar aýdardy. Onyń sózine qaraǵanda, bul iste memlekettik organdar men áleýmettik kásipkerlerdiń arasyndaǵy ózara is-áreketti jandandyrý kerek. Sondyqtan partııa tarapynan osy baǵytta tıisti jumystar qolǵa alynbaq.
– Atalǵan iste áleýmettik kásipkerlikti damytýdyń naqty erejesin qalyptastyrýǵa jáne normatıvtik-quqyqtyq bazany jetildirýge kóńil bólý kerek. Ol áleýmettik kásipkerler men jumys isteıtin múmkindigi shekteýli jandardyń múddesin qorǵap qana qoımaı, memlekettik organdardyń saıasatyna da saı bolýy tıis. Sondyqtan osyndaı máselelerdi Eńbek jáne halyqty áleýmettik qorǵaý mınıstrliginiń aldyna qoıyp, tıisti jumystardyń qolǵa alynýyna yqpal etetin bolamyz, – dedi «Nur Otan» partııasy Tóraǵasynyń Birinshi orynbasary.
Aıta keteıik, «GreenTAL» áleýmettik sheberhanasy jas kásipker Emın Askerovtiń bastamasymen osydan tórt jyl buryn ashylǵan. Onda múmkindigi shekteýli jandardy oqytyp, jumysqa ornalastyrýǵa qajetti jaǵdaı jasalǵan. Sheberhana Psıhıkalyq densaýlyqtyń medısınalyq ortalyǵy janyndaǵy Psıhoáleýmettik ońaltý ortalyǵynda ornalasqandyqtan, mundaǵy qyzmetkerlerdiń basym bóligi sozylmaly mentaldi aýytqýshylyqqa shaldyqqan jandar.
– Áleýmettik kásipkerlikpen aınalysqysy kelgen jan aldymen bul istiń qoǵamǵa qandaı paıdasy bar ekenin anyqtap alýy kerek. Kásibiń men ishki jan-dúnıeńde de úılesim bolýy tıis. Men qandaı kásippen aınalyssam da baılyqqa belshemnen batýdy kózdegen joqpyn. Qaıta bıznesim arqyly halyqqa qandaı da bir kómegimdi tıgizýdi maqsat tuttym. Osylaısha, áleýmettik kásipkerlikke bet burdym, – deıdi Emın Askerov.
Búginde atalǵan áleýmettik sheberhanada temir, aǵash, dánekerleý, tigin jáne bezendirý sehtary, kórkemóner stýdııasy, sondaı-aq, tıpografııa jumys isteıdi. Osy jerde daıyndalǵan ónimder Astana naryǵynda joǵary suranysqa ıe. Sondaı-aq taıaýda munda trennıg-kafege arnalǵan bólim de ashylǵan. Ol jerde daıashylar, barmender jáne as úı qyzmetkerlerin daıarlaıtyn kýrstar jumys isteıdi.
