Bıyl 9-18 qańtary aralyǵynda Dakke qalasynda halyqaralyq kınofestıval ótken. Osy festıvalde Qazaqstan Respýblıkasy Mádenıet jáne sport mınıstrliginiń tapsyrysy boıynsha «Adıgýl prodakshn» kınokompanııasynyń qatysýymen Sh.Aımanov atyndaǵy «Qazaqfılm» AQ túsirgen "Bizdiń qalanyń hanzadasy" týyndysy "Eń úzdik balalar fılmi" júldesin jeńip aldy. Aıta keteıik, «Bizdiń qalanyń hanzadasy» kórkem fılmi jalǵyzdyqtyń kúıin keship júrgen balalar úıiniń 6 jasar tárbıelenýshisi men qarttar úıiniń ardageri arasyndaǵy dostyǵyn baıandaıdy. Fılmniń rejısseri ári ssenarıı avtory - Qazaqstannyń halyq ártisi Talǵat Temenov («Adamdar arasyndaǵy bóltirik», «Qyzǵysh qus», «Mahabbat beketi»).
Basty rólderdi Ánýar Tóleýǵajy jáne Tóleýbek Aralbaı («Jaýjúrek myń bala», «Joıýshy», «Tyǵyryqtan jol tapqan») somdady. Sonymen qatar, fılmge Q. Qýanyshbaev atyndaǵy Memlekettik akademııalyq qazaq mýzykalyq-drama teatrynyń (Astana qalasy) akterleri túsken. Fılmniń túsirilim jumystary Astanada jáne Aqmola oblysynyń Býrabaı aýylynda ótken. Kartınanyń tusaýkeseri 2017 jyly 1 maýsymda, Halyqaralyq balalardy qorǵaý kúnine oraı Astana qalasynda ótken bolatyn. Al qazan aıynda elimizdiń kınoteatrlarynan kórsetilgen. Sonymen qatar, atalmysh kınotýyndy qyrkúıek aıynda Reseıde ótken II Halyqaralyq «Eýrazııalyq kópir» kınofestıvaliniń negizgi baǵdarlamasy sheńberinde kórsetilgen edi.
Aıta keterligi, fılmde basty róldi somdaǵan akter, Qazaqstannyń eńbek sińirgen qaıratkeri Tóleýbek Aralbaı Qytaıda ótken kınofestıvalde «Úzdik er adam róli» júldesimen marapattalǵan bolatyn.
