Týrnır qorytyndysy boıynsha, Alýa Balqybekova (48 keli), Dına Jolaman (54 keli), Rımma Volosenko (60 keli) jáne Lázzat Kúngeıbaevalar (+81 keli) chempıon atandy.
51 kelidegi fınaldyq jekpe-jekte álem chempıony Nazym Qyzaıbaı óziniń otandasy Angelına Lýkasqa ese jiberdi.
Alýa Balqybekova fınalda reseılik Iýlııa Chýmgalakovany jeńse, Dına Jolaman tóreshiler sheshimimen vengrııalyq Sabına Shýsstan basym tústi.
Týrnırdiń úzdik boksshysy atanǵan Rımma Volosenko horvatııalyq Sara Beramnan myqtylyǵyn dáleldedi. Asa aýyr salmaqtaǵy Lázzat Kúngeıbaeva reseılik boksshy Aleksandra Dmıtrıevadan altyndy tartyp aldy.
Osylaısha, 5 altyn, 1 kúmis jáne 1 qola medal ıelengen bokstan Qazaqstan áıelder quramasy jalpy esepte kósh bastady. Ekinshi orynda Reseı, úshinshi satyda Serbııa quramalary ornalasqan.
Qazaqstandyq boksshylar eresektermen qatar, jastar men jasóspirimder arasynda da top jaryp, Sýperkýbokti ıelendi.
Serbııadaǵy «Ulttar kýbogi» halyqaralyq týrnırine álemniń 20 memleketinen 170 sportshy qatysqan bolatyn.
