Mınıstrdiń aıtýynsha, 2018 jyly granttar sany 20 myńǵa kóbeıtildi. Elimizdegi granttardyń jalpy jyl saıyn bólinetin sany 69 myńǵa jetti: 53 myń stýdent – bakalavrıatta, 13 myńy – magıstratýrada, 2 myńnan astam adam PhD baǵdarlamalary boıynsha bilim alyp jatyr.
E.Saǵadıev barlyq grant alýshylardyń 50%-y tehnıkalyq mamandyqtar boıynsha (34 myń) bilim alyp jatqanyn atap ótti. Olardyń ishinde aqparattyq-kommýnıkasııalyq tehnologııalar, kıberqaýipsizdik, radıotehnıka jáne elektronıka sekildi eńbek naryǵy úshin mańyzdy baǵyttar bar. «Serpin» baǵdarlamasy boıynsha aýyl jastaryna 5 myń grant qarastyrylǵan. Granttardyń shamamen 20%-y muǵalimderdi daıarlaýǵa, onyń ishinde tildik biliktilikti kúsheıtýge baǵyttalǵan.
Barlyq joǵary oqý oryndarynda tehnıkalyq jáne aýyl sharýashylyǵy mamandyqtary boıynsha granttar quny ulttyq JOO-lardaǵy granttarmen birdeı bolyp, 635 myń teńgeni qurady. Osylaısha, Bilim jáne ǵylym mınıstriniń aıtýynsha, Memleket basshysynyń granttardy bólý jáne qunyn arttyrý týraly tapsyrmasy tolyǵymen oryndaldy.
Joǵary bilimniń qoljetimdiligin qamtamasyz etý úshin qosymsha sharalar qabyldanyp jatyr.
Birinshiden, UBT jylyna 4 ret ótkiziledi. 2019 jylǵy qańtar aıynda birinshi ret testileý ótkizildi. Oǵan 35 myńnan asa mektep túlegi qatysty. Olarǵa aqpan aıynan bastap aqyly oqý úshin joǵary oqý oryndaryna túsýge múmkindik berildi.
Ekinshiden, «Bilim týraly» zańǵa engizilgen ózgeristerge sáıkes bakalavrıatqa uqsas magıstratýraǵa qabyldaýdyń jańa modeli engizilýde. Bilim berý grantyn taǵaıyndaý úmitkerlerge JOO tańdaý múmkindigin bere otyryp, keshendi testileý nátıjeleriniń negizinde iske asyrylady.
Buǵan qosa, E.Saǵadıev mınıstrlik jataqhanalarda jańa oryndardy berý jumystaryn jalǵastyryp jatqanyn aıtty. 2019 jyly 5000 oryn berý kózdelgen.
«Búginde úsh jarym aı ishinde bizge 11 144 orynǵa 20 ótinish kelip tústi, 6556 orynǵa 12 kelisimshart jasaldy. Olardyń kóbisi salyna bastady. Sonymen qatar, osy aıdyń sońyna deıin 4588 orynǵa taǵy 8 kelisimshart jasasýdy josparlap otyrmyz. Bul – kelesi jyly beriletin jobalar», — dedi E. Saǵadıev.
Bilim jáne ǵylym mınıstri osy joba iske asyryla bastaǵannan beri bilim berý uıymdary óz qarajattary esebinen, osy memlekettik tapsyrys tetigin qoldanbaı 2780 orynǵa arnalǵan 10 nysandy engizgenin atap ótti.
Jalpy, 2022 jyldyń sońyna deıin 75 myń jańa oryndy paıdalanýǵa berý úshin barlyq jaǵdaı jasalǵan. 170 jer telimi anyqtalǵan. Olardyń 121-i bilim berý uıymdaryna tıesili, 49-yn ákimdikter bólgen. 27 uıym jobalyq-smetalyq qujattamany (JSQ) ázirledi, 62-si ázirlep jatyr. Ázirlengen jáne úlgilik JSQ banki quryldy, ony jobanyń jańa qatysýshylary paıdalana alady.
107 joba boıynsha qarjylandyrý kózderi anyqtaldy: 50 joba — óz qarajattary esebinen, 57-sin ınvestorlardyń qarajaty esebinen iske asyrý josparlanyp otyr.
Tetikke qatysýǵa jeke sektordy tartý máselesi asa ózekti ári yntalandyrýdyń qosymsha sharalaryn talap etedi. Atap aıtqanda, BǴM Bıznestiń jol kartasyn 2025 jylǵa deıin uzartý aıasynda qurylys salýshylardyń nesıe mólsherlemelerin sýbsıdııalaýdy usynady. Sonymen qatar, jergilikti atqarýshy organdar tarapynan jer telimderin bólý jumysyn jedeldetý qajet.
«Jalpy alǵanda, Memleket basshysynyń Úshinshi bastamasy josparlanǵan merzim aıasynda júzege asyrylyp jatyr jáne ony turaqty baqylaýda ustap otyrmyz», — dep túıindedi E.Saǵadıev.
