Ádette ıttiń ıeleri túnde qaýmaldan shyǵaryp, aýlaǵa bosatyp jiberip otyrǵan. Oqys oqıǵa bolǵan kúni 67 jastaǵy áıel arnaıy orynǵa kirgize almaı, ábden áýre-sarsańǵa túsedi. Jaıshylyqta aıtqanǵa tez kóne qoıatyn tóbettiń yzasyna tıip ketse kerek, qarsy shaýyp, tarpa bas salady. Ý-shýdy estip, kómekke kelgen otaǵasyna da tura umtylyp, talap tastaıdy. Áıteýir áıeli kómek shaqyryp úlgeredi.
Shuǵyl jetken jol-patrýldik polısııa batalonynyń qyzmetkerleri ıesin tistelep jatqan tórt aıaqty taǵyǵa tabeldik qarý qoldanǵanmen, taıynshadaı tóbettiń qalyń terisine oq darymaǵan. Odan saıyn yzalanyp, shabalana túsken. Aqyry veterınarlyq qyzmet mamandary ýly oqpen atyp óltirgen.
Aýyr dene jaraqatyn alǵan úı ıesi jedel aýrýhanaǵa jetkizilip, jan saqtaý bólimshesine jatqyzylǵan.
Kúshik kezinen asyraǵan alabaı tuqymdas ıttiń alabóten minez kórsetip, agressııalyq áreketke túsýine kórshileri de ań-tań. «Kúshik asyrap ıt ettim, ol baltyrymdy qanatty» degen osy bolar, sirá! It ıttigin istemeı turmaıtynyn esten shyǵarmaǵan jón.
Byltyr óńirde ıtten 181 adam, bıyl 12 adam zardap shekken.
О́mir ESQALI,
«Egemen Qazaqstan»
PETROPAVL
