«Qazgıdromet» RMK BQ fılıalynan túsken aqparaty boıynsha qardyń ortasha qalyńdyǵy byltyrǵymen salystyrǵanda ájeptáýir joǵary. Ásirese ádette qysy jaıly ótetin ońtústiktegi Bókeı ordasy, Jánibek aýdandary bıyl qys qıyndyǵyn, jol azabyn tartyp jatyr. Mysaly, Bókeı ordasy, Jánibek aýdandarynda byltyr qar bolmasa, bıyl onyń qalyńdyǵy 28-36 sm-ge jetken.
– Qys mezgilinde respýblıkalyq jáne jergilikti mańyzdaǵy joldardy kútýge qajetti janar-jaǵarmaı qory 850 tonnaǵa jýyq kólemde jasaqtaldy. Taıǵaq jolǵa qoldaný úshin 20 myń tonnaǵa jýyq qum, 3 myńǵa jýyq tuz jáne 8 myń tonnadan astam qum-tuz aralas qospa daıyndaǵan edik. Qazir halyq ıgiline asyp jatyr. Qys mezgilinde respýblıkalyq jáne jergilikti mańyzdaǵy joldardy kútýge 357 jol tehnıkasyn jumyldyryp, 17 jylytý pýnkti uıymdastyryldy, – deıdi Batys Qazaqstan oblystyq Tótenshe jaǵdaılar departamenti tótenshe jaǵdaılardyń aldyn alý bóliminiń bastyǵy, azamattyq qorǵaý maıory Mars Otarov.
Alaıda osy sharalarǵa qaramastan jyl saıyn respýblıkalyq jáne jergilikti mańyzdaǵy joldarda qar qursaýynda qalyp qoıatyn avtokólik kóp. Mysaly, osy qysta TJ departamenti, jol qyzmeti men polısııa qyzmetkerleri jáne jergilikti ákimdikter kúshimen jolda qalǵan 94 tehnıka men 173 adam qutqarylǵan. Munyń sebebi arnaıy joǵary ótimdi tehnıkalar jetispeıdi. «QazAvtoJol» RMK fılıalynyń arnaıy tehnıkamen qamtylýy nebári 50% shamasynda ǵana eken. «Atalǵan qyzmette úlken júk kólikterin súıreıtin arnaıy tehnıkalar joqtyń qasy», deıdi Mars Otarov.
Qazbek QUTTYMURATULY,
«Egemen Qazaqstan»
Batys Qazaqstan oblysy
