Jaqynda Ile aýdandyq sotynda jábirlenýshi muǵalimniń aryzyna oraı qozǵalǵan qylmystyq is boıynsha sot sheshimi shyqty. Jalpy, jylǵa jýyq ýaqyt boıy tergelip, sotqa deıingi anyqtaý sharasyna birneshe ret qorǵaýshy tarapynan narazylyq jasalyp, prokýratýranyń aralasýymen aıaqtalǵan is sot barysynda da uzaq qaraldy. О́tken aptada aıaqtalǵan sot otyrysynda sýdıa Erkin Seıitov «Qylmystyq kodekstiń» 107-babynyń 1-bólimi boıynsha qylmys jasaǵan Mıtroshenko Nadejda Pavlovany aıypty dep taýyp, oǵan 250 saǵat kóleminde qoǵamdyq jumystarǵa tartý jazasyn taǵaıyndady.
Sot otyrysynan keıin jýrnalıstermen kezdesken Gúlzıra Baıdildaeva Ile aýdandyq sotynyń sýdıasy Erkin Seıitovtyń shyǵarǵan úkimimen kelispeıtinin aıtyp, joǵary ádilet ınstansııasyna appelıasııalyq shaǵym túsiretin habarlady.
- Soqqy saldarynan mıym shaıqalyp, estý qabiletim tómendedi. Ádette mundaı qylmys úshin 5 túrli jaza bar eken. 2,5 mıllıon teńgege deıin aıyppul salý, 600 saǵattan aspaıtyn jumysqa tartý, 2 jylǵa bostandyǵyn shekteý nemese aıyrý jazasy. Negizi Mıtroshenkonyń ońaı jazamen qutylatyny bir jyl boıy isti qaıta-qaıta toqtatý amaldarynyń kezinde-aq túsinikti bolyp edi. Biraq biz sonda da prokýror bolsyn, tergeýshi bolsyn, tynbastan esikterin qaǵyp júrip, isti osy kúnge jetkizgen bolatynbyz. Jalpy, osy muǵalimderdi, ustaz degen uly esimdi bolashaqta osyndaı ata-analar tarapynan qorlaý oqıǵasyn boldyrmaý maqsatynda alǵan betimizden qaıtpaǵan edik. Sondyqtan bul men úshin óte ádiletsiz sheshim, - deıdi Gúlzıra.
Al sot otyrysynda óz aıybyn moıyndaǵan ata-ana Nadejda Mıtroshenko ashý ústinde jasaǵan áreketi úshin Gúlzıra Baıdildaevadan jáne búkil ustazdar qaýymynan keshirim surady. Sondaı-aq, aıypker jábirlenýshi tarapqa 100 000 teńge kóleminde moraldyq ótemaqy tóleıtin boldy.
Osylaısha jylǵa jýyq ýaqyt boıy eldi eleńdetken muǵalimdi jábirlegen ata-ana isine núkte qoıylǵan syńaıly. Biraq, 15 kún ishinde talap aryz berý arqyly oblystyq sotqa júginetin jábirlenýshi tarap ádilet ornap, aýdandyq sot sheshiminiń kúshi joıylady degen úmitte.
Qalmahanbet MUQAMETQALI,
«Egemen Qazaqstan»
Almaty oblysy
