Qurylys quny eki jarym mıllıardqa jýyq teńgeni quraıdy. Al О́.Sultanǵazın atyndaǵy memlekettik pedagogıka ýnıversıtetinde de 86 oryndyq 3 qabatty jataqhana boı kótermek. Onyń qurylys-montaj jumystary 670 mıllıon teńgeden astam qarjyny talap etedi. Eki jataqhananyń da qujattary daıyn. Qurylysty qandaı kompanııa júrgizetini qys aıaǵyna qaraı jarııalanatyn konkýrsqa baılanysty bolady.
Munymen qatar, oblys ortalyǵynda Qurylys kolledji, Joǵary polıtehnıkalyq kolledji jáne Medısına kolledji úshin úsh jataqhana salynbaq. Olarǵa da bıýdjetten qomaqty qarjy bólindi. Oblys ákimi Arhımed Muhambetov jataqhanalar qurylysynyń sapasyna jáne barynsha syıymdylyǵyna mán berilýi kerektigin eskertti.
«Jataqhanalarǵa akt zal sekildi kóbine bos turatyn artyq bólmeler kerek emes dep oılaımyn. Stýdentter jınalatyn akt zaldar ýnıvesrıtet korpýstarynda da jetkilikti emes pe? Sondyqtan jataqhanada kishkentaı holl, dáliz bolsa jetedi, qalǵanyn múmkindiginshe stýdentter turatyn bólme etý kerek. Jobany jasaǵanda bul eskerilýi tıis» dedi Arhımed Begejanuly.
О́ńir basshysy sonymen qatar jataqhanalar qurylysyn lajynsha qar ketip, jer qurǵaǵan soń bastaı berý kerektigin de basa aıtty.
Názıra JÁRIMBET,
«Egemen Qazaqstan»
Qostanaı
