Jumyspen qamtýdy úılestirý jáne áleýmettik baǵdarlamalar basqarmasynyń bólim jetekshisi Alma Mahmetovanyń aıtýynsha, memleket tarapynan qolǵa alynǵan aýqymdy baǵdarlama teriskeı jaqtarda eńbek naryǵyn nyǵaıtýda, kadr tapshylyǵyn joıýda, turǵylyqty halyqty kóbeıtýde óz nátıjesin berip keledi. Nátıjeli jumyspen qamtý jáne jappaı kásipkerlikti damytýdyń 2017 – 2021 jyldarǵa arnalǵan baǵdarlamasy sheńberinde qonys aýdarǵan otbasylardyń ár múshesine 35 aılyq eseptik kórsetkish kóleminde demeýqarjy tólenedi. Turǵyn úıdi jalǵa alý, kommýnaldyq tólemderdi óteý boıynsha da shyǵyndar orny toltyrylady. Búginge deıin qonystanýshylardan 238 otbasy turǵyn úılerin tolyqtaı satyp aldy. 600-den astam adam jumysqa ornalastyryldy.
Eńbek resýrstarynyń tıimdiligin arttyrý boıynsha jumys kúshi kóp ońtústik óńirlerden turǵyndardy tartý bıyl da jalǵasyn tabady. Bul baǵdarlama densaýlyq saqtaý salasyndaǵy mamandar qataryn tolyqtyrýǵa oń yqpal etpek. Sońǵy eki jylda Aqqaıyń aýdandyq aýrýhanasyna joǵary sanatty 4 dáriger kelgen. Barlyǵy da jaıly qyzmettik úıge jaıǵasqan. Osylaısha densaýlyq saqtaý salasy boıynsha aýdandaǵy kadr tapshylyǵy birtindep sheshilip keledi.
Eginshilikpen, kókónis ósirýmen aınalysqysy keletinderge tálimi jerler bólinip beriledi.
«Eńbek» memlekettik baǵdarlamasy sheńberinde oblysymyzǵa qonys aýdarýshylarǵa 302 eldi mekende turǵyn úı salý jáne satyp alý boıynsha keshendi jospar ázirlengen. Osyǵan oraı bıyl 600 baspana turǵyzylady. Al 2020 jyly – 1 myń, 2021 jyly 1400 turǵyn úı salý josparlanǵan.
О́mir ESQALI,
«Egemen Qazaqstan»
Soltústik Qazaqstan oblysy
