Otannyń otty qalqany
Seısenbi, 27 qarasha 2012 7:03
«Saryshaǵan» áskerı polıgonynda Qazaqstan Respýblıkasy Qarýly Kúshteri Raketa áskerleri men artıllerııanyń «Atys tolqyny-2012» oqý-jattyǵýy bolyp ótti. Qorǵanys mınıstri Ádilbek Jaqsybekov jeke quramnyń artıllerııadan atý men zymyrandyq soqqy berý tapsyrmalaryn oryndaý is-qımyldaryn baqylady.
Seısenbi, 27 qarasha 2012 7:03
«Saryshaǵan» áskerı polıgonynda Qazaqstan Respýblıkasy Qarýly Kúshteri Raketa áskerleri men artıllerııanyń «Atys tolqyny-2012» oqý-jattyǵýy bolyp ótti. Qorǵanys mınıstri Ádilbek Jaqsybekov jeke quramnyń artıllerııadan atý men zymyrandyq soqqy berý tapsyrmalaryn oryndaý is-qımyldaryn baqylady.
Jattyǵýdyń negizgi maqsaty – artıllerııalyq atý quraldarynyń qoldanylý tıimdiligin tájirıbelik-zertteý arqyly tekserý bolyp tabyldy. Bul joly nysana retinde ótelge jiberilgen shynaıy jaýyngerlik kólikter paıdalanyldy.
Tájirıbelik atystarǵa Raketa áskerleri men artıllerııa qolbasshysy, polkovnık Lut Álshekenov basshylyq jasady. Sondaı-aq, jattyǵýǵa Qazaqstannyń qorǵanys ónerkásibi kesheniniń ókilderi de qatysty.
Artıllerııalyq bólimderdiń 400-den asa áskerı qyzmetshisi biriktirilgen marsh ótkizip, belgilengen ýaqytta polıgonǵa shoǵyrlandy.
Ekıpajdardyń, eseptoptardyń, vzvodtardyń jeke quramy atys shebine shyǵyp, qarýdy atýǵa daıyndaý normatıvin oryndady. Sosyn naqty atys júrgizdi.
Raketa áskerleri men artıllerııa – Qurlyq áskerleriniń basty qýatty kúshi. Artıllerııashylar men raketshiler qarsylaspen urys júrgizýde basty tapsyrmalardy oryndaıdy.
Jattyǵý sońynda qorǵanys vedomstvosynyń basshysy eń úzdik áskerı qyzmetshilerdi jaýyngerlik oqýdaǵy jaqsy kórsetkishteri úshin ataýly saǵattarmen marapattady. Qazirgi tańda artıllerııashylar men zymyranshylar ózderiniń áskerı sheberligin jetildirý maqsatynda jeke qurammen atý taktıkalyq oqýlaryn udaıy ótkizip turady.
– Ofıserlerdiń kásibı daıyndyǵyn arttyrý maqsatynda ártúrli oqytý ádisteri men tásilderi qoldanylady, – dedi Qorǵanys mınıstri Ádilbek Jaqsybekov. – Oqytýdyń tıimdi túri – dıvızıon komandırleriniń dalalyq jaǵdaıdaǵy biliktiligin arttyrý, armııany zamanaýı jaýyngerlik tehnıkamen jabdyqtaý Joǵarǵy Bas qolbasshynyń bizge qoıǵan basty tapsyrmalarynyń biri bolyp tabylady.
Atalmysh shara bul áskerler teginiń joǵary, sapaly dárejege jetkenin kórsetti, – dep habarlady Qorǵanys mınıstrliginiń baspasóz qyzmeti.
——————————————–
Sýretterdi túsirgen Ermek Sarbasov.
