Oblys ortalyǵyndaǵy Jekpe-Jek saraıynda ótken sharaǵa qurmetti qonaq retinde kásipqoı boksshy Qanat Islam, aqyn Qalqaman Sarın, jeńil atlet, úsh birdeı Olımpıada júldegeri Olga Rypakova, «Altaı» voleıbol klýbynyń beldi oıynshysy Krıstına Anıkınova shaqyrylypty. Saltanatty sharada birinshi bolyp sóz alǵan shahar basshysy Jaqsylyq Omar qala ákimdigi Jastar jylyn atap ótýge erekshe ázirlikpen kelgenin, ataýly jylǵa arnaıy is-jospar bekitilgenin jetkizdi. «Jastar jyly aıasynda túrli is sharalardan bólek, qalamyzdaǵy jigerli, básekege qabiletti jastardy qoldaýǵa, olarǵa baǵyt-baǵdar berýge kóńil bólmekpiz. О́skemendegi 400 myńǵa jýyq halyqtyń 25 prosentin jastar quraıdy. «Kún Shyǵystan shyǵady» dep bekerge aıtylmasa kerek. Aksııany elden erte bastap jatqanymyzdyń sebebi de sol. О́skemenniń alpys eki tamyry halqym dep soqqan jastary osy jyldy aıryqsha kóńil-kúımen, aıryqsha úmitpen, úlken sergektikpen atap ótedi dep oılaımyn», - dedi qala ákimi.
Shara barysynda qurmetti qonaqtar sahnaǵa shyǵyp, sóz sóılep, Olga Rypakova jas atlet Elızaveta Matveevaǵa, Qalqaman Sarın jas aqyn Erasyl Ermekulyna, Qanat Islam jas sportshy Baýyrjan Sátjanovqa, Krıstına Anıkınova 43 mekteptiń jas voleıbolshysyna estelik syılyqtaryn tapsyrdy. О́skemendik «Inkorro» toby, «H-Faktor» jeńimpazy Evgenıı Vyblov, «Ty sýper» televızııalyq jobasynyń fınalısi Vlad Loskýtov pen alystan at arytyp kelgen «Made in KZ" tobynyń áýeletken ánderi men kúmbirlegen kúıleri jastar aksııasynyń sánin kirgizip, kórermenderdiń kóńilin bir serpiltip tastady.
Reti kelgende aıta keteıik, О́skemenge qurmetti meıman retinde shaqyrylǵan Qanat Islam men Qalqaman Sarın osy saparlarynda oblys ortalyǵynyń birneshe mektebinde oqýshylarmen kezdesip, emen-jarqyn áńgime-dúken quryp qaıtty.
Azamat QASYM,
«Egemen Qazaqstan»
О́SKEMEN
