Poezııa keshiniń shymyldyǵy aqynnyń óz daýysymen oqyǵan «Bulqynyp jatyr» óleńimen ashyldy. Áıgili aqyndy eske alýǵa arnalǵan sharada I. Jansúgirov atyndaǵy Jetisý memlekettik ýnıversıtetiniń stýdentteri qurǵan «Mızam» ádebı klýbynyń músheleri kórermenderdi Muqaǵalı jyrlarymen sýsyndatty. Al jas ánshiler aqynnyń sózine jazylǵan ánderdi náshine keltirip oryndady. Sondaı-aq keshte daryndy jastardyń izbasary, 4 synyptyń oqýshysy bal tildi Aısha Amanbekqyzy «Úsh baqytym» óleńin mánerlep oqyp, kópshilikti tánti etti.
Jyr súıer qaýymǵa kóterińki kóńil kúı syılaǵan jastar Almaty oblysynyń tilderdi damytý jónindegi basqarmasynyń Alǵys hatymen marapattaldy.
- Bul sharanyń maqsaty – memlekettik tildiń qoldanylý aıasyn keńeıtip, qoǵamdyq sanaǵa ornyqtyrý, aqıyq aqynnyń jalyndy jyrlary arqyly jastardyń azamattyq jáne patrıottyq áleýetin damytý, - deıdi basqarmanyń tilderdi damytý bóliminiń basshysy Týǵanaı Rahymberlına.
Qalmahanbet MUQAMETQALI,
«Egemen Qazaqstan»
Almaty oblysy
