«Qazaqstan Úkimetiniń sıfrlyq tehnologııalardy engizý turǵysynan atqaryp jatqan jumystaryna tamsana qaraımyn. Úkimetti sıfrlandyrý, dálirek aıtqanda memlekettik qyzmetterdi elektrondy formatta usyný ótken jyly shamamen 60% qurady, bıyl osy kórsetkishti 80%-ǵa deıin arttyrý kózdelgen. Bul osyndaı qysqa merzim úshin tamasha kórsetkish. Qazaqstan qarqyndy túrde transformasııalanyp jatyr. Qazaqstannyń sıfrlandyrýdy engizý salasyndaǵy tájirıbesin ózge elderde qoldanýǵa bolady dep oılaımyn. Basqa memlketterge Qazaqstanda engizilip jatqan reformalardy esh kúmánsiz úlgi retinde alýǵa bolady», — dedi sarapshy.
Dj. Sıglerdiń pikirinshe, Qazaqstanǵa sıfrlyq baǵytty damytý qarqynyn báseńdetýdiń qajeti joq. Jas ǵalymdardy yntalandyrýdy odan ári jetildirip, ózderiniń daǵdylary men túıgen-bilgenderin iske asyrýǵa múmkindik berip, múmkindiginshe biregeı startaptardy kóbirek iske qosý kerek. Sonymen qatar, ınvestorlar men mentorlardy tartýǵa arnalǵan ámbebap alań qurý máselesine kóńil bólý kerek, olar Qazaqstandaǵy jumystyń barlyq múmindikterin baǵalaı alýy qajet.
Spıker búginde Astana Hub-ta aqparattyq salada jetistikterge jetýdi kózdep júrgen, sondaı-aq basqa elderdiń ǵalymdarymen adal básekelestikke túse alatyn jetkilikti jas ǵalymdar bar ekenin atap ótti.
Dj. Sıgler Astana Hub halyqaralyq tehnoparki qyzmet kórsete bastaǵan ýaqyt ishinde aýqymdy jumystardy oryndaǵanyn aıtty: myńnan astam qatysýshyny tarta otyryp, 47 ártúrli joba iske asyrylǵan.
Buǵan qosa, sarapshy Astana Hub qyzmetiniń ony basqa halyqaralyq tehnoparkterden ereksheleıtin biregeıligin atap ótti.
«Men Sıngapýrde de, Avstralııada da baıqamaǵan bir faktke nazar aýdarǵym keledi – táýekelderdi barynsha azaıtýǵa jáne nysandy ınvestorlar men startapshylar úshin asa tartymdy etýge múmkindik beretin progressıvti salyq salý rejımi usynylǵan. Bul bizge múmkindiginshe básekege qabiletti bolýǵa demeý bolatyn qural, jáne osy salyq salý rejımderi jaǵdaıdy odan ári jaqsarta túsedi», — dedi ol.
Sarapshynyń aıtýynsha, 2018 jyl tehnopark úshin óte tabysty jyl boldy. 2019 jyly Astana Hub elimizde sıfrlyq tehnologııalardy damytýdyń aldyńǵy qatarly qozǵaýshy kúshi, draıverine aınalýy úshin kólemdi jumystar atqarý qajet.
«Biz adamdarǵa sıfrlyq ortaǵa qalaı ınvestısııa salý kerek ekenin úıretýimiz kerek. Bizdiń mindetimiz – atalǵan proseske shetten qatysýshylar tartyp, klıentter bazasyn keńeıtý úshin barlyq múmkindikti jasaý. Ideıanyń máni – tehnologııalyq parkterdi biriktirip, olardyń tek el ishindegi parktermen emes, sondaı-aq aımaqtarda ornalasqan parktermen barynsha kóp jumys isteýine kóz jetkizý», — dedi Djozef Sıgler.
Budan ózge, Astana Hub mindeti — ınnovasııalyq ekojúıe qurý: neni basqalardan jyldamyraq jáne jaqsyraq etip jasaýǵa bolady?
«Biz bárinen alda bolýymyz kerek. Neǵurlym básekege qabiletti bolý kerek. Múmkindikteri shekteýli jandardy qosa alǵanda, barlyq sanattaǵy azamattar ózderin yńǵaıly sezinýi úshin tehnologııalardy qoljetimdi etý qajet», — dedi ol.
